राष्ट्रपति जापान, प्रधानमन्त्री अजरबैजान सँगसँगै

 काठमाडौं,असाेज १४ ।चिनियाँ राष्ट्रपति सी जिन पिङ यही असोज २७ मा नेपाल आउने र राष्ट्रपति विद्यादेवी भण्डारी त्यसको अर्को साता जापानतिर लाग्ने सुरक्षा स्रोतले जानकारी दिएको छ।

 

तर, सम्बद्ध सरकारी कार्यालयले औपचारिकरूपमा भ्रमण तालिकाको जानकारी दिएको छैन। जापानका नयाँ सम्राट नारोहितोको राज्याभिषेक समारोहमा सहभागी हुन राष्ट्रपति भण्डारी टोकियो प्रस्थान गर्ने तयारीमा जुट्नुभएको शीतल निवास स्रोतले पुष्टि गरेको छ।

 

कात्तिक ५ मा आयोजना हुने सम्राट नारोहितोको राज्याभिषेकमा सहभागी हुन विश्वबाट २ हजार ६ सय पाहुना जापान पुग्दै छन्। जापानी सञ्चारमाध्यमका अनुसार सो दिन मुलुकभर बिदा घोषणा गरेर राष्ट्रिय पर्वका रूपमा राज्याभिषेक मनाइनेछ।

 

सम्राट अकिहितोले उमेर र स्वास्थ्यका कारण युवराज नारोहितोलाई ६ महिनाअघि राजगद्दी हस्तान्तरण गर्नुभएको थियो। अकिहितोको २०४७ सालमा राज्याभिषेक हुँदा विश्वका विभिन्न मुलुकबाट झन्डै ३ हजार ५ सय अतिथि सहभागी थिए।

 

कात्तिक ५ देखि १४ सम्म हुने राज्याभिषेकका जम्मा चार समारोहमा नारोहितो सहभागी हुने कार्यक्रम छ। उहँँको पिताका पालामा यस्ता सात समारोहको आयोजना गरिएको थियो। ८५ वर्षीय अकिहितोले वैशाख १७ गते सम्राट पदबाट राजीनामा दिएपछि १८ मा नारोहिताले राजगद्दी समाल्नुभएको हो।

 

राष्ट्रपति भण्डारी वर्मा हुँदै टोकियो पुग्ने प्रारम्भिक कार्यतालिका तयार भएको राष्ट्रपति कार्यालयले जनाएको छ।

राष्ट्रपति भण्डारीको भ्रमण आसपासमा प्रधानमन्त्री केपी शर्मा ओली पनि युरोपेली मुलुक अजरबैजानको भ्रमणमा जानुहुने भएको छ।

 

सो मुलुकको राजधानी बाकुमा कात्तिक ८ र ९ गते हुने असंलग्न राष्ट्रहरूको सम्मेलनमा सहभागी हुन त्यता प्रस्थान गर्ने प्रधानमन्त्री तथा मन्त्रिपरिषद्को कार्यालयले जनाएको छ।

 

प्रधानमन्त्री ओलीले सम्मेलनलाई सम्बोधन गर्ने बताइए पनि यसबारेको विस्तृत कार्यतालिका अझै तयारी हुन बाँकी रहेको बताइएको छ। सम्मेलनमा १ सय २० राष्ट्रका राष्ट्राध्यक्ष, सरकार प्रमुख र प्रतिनिधि सहभागी रहनेछन्।नेपाल समाचारपत्रमा खबर छ।