३१२ स्थानिय तहको परिणाम सार्वजनीक
काठमाडौं । दोस्रो चरणमा चुनाव भएका ३५ जिल्लाका ३३४ स्थानीय तहमध्ये बुधबार बेलुकासम्म ३१२ स्थानको मतगणना सकिएको छ । अब २२ स्थानीय तहको मात्र मतपरिणाम आउन बाँकी छ ।
अहिलेसम्म १३८ स्थान जितेर नेकपा एमाले अग्रस्थानमा छ । मतगणना भइरहेका १३ स्थानमा अग्रता राख्दै एमालेले दोस्रो चरणमा पनि पहिलो स्थान सुरक्षित गरेको छ ।
दोस्रो दल बनेको नेपाली कांग्रेसले ११७ स्थान जितेको छ । त्यस्तै, माओवादी केन्द्र ३६ स्थानीय तह जितेर तेस्रो स्थानमा छ । संघीय समाजवादी फोरम ७ र फोरम लोकतान्त्रिकले ६ स्थानीय तह जितेका छन् ।
राप्रपा ४ स्थानीय तह जितेर छैटौं स्थानमा रहेको छ भने २ स्थानीय तह जितेको राष्ट्रिय जनमोर्चा सातौं स्थानमा छ । २ स्थानीय तहमा स्वतन्त्र उम्मेदवारले जितेका छन् ।
२२ स्थानीय तहको मतपरिणाम आउन बाँकी रहँदा अधिकांश ठाउँमा गणना भइरहेको छ । धरान उपमहानगरपालिका, झापाको अर्जुनधारा नगरपालिकामा विवादका कारण मतगणना स्थगित छ ।
प्रदेशगत रुपमा हेर्दा एमालेले एक नम्बर प्रदेशमा ६० स्थानीय तह जितेको छ भने कांग्रेसले ४७ स्थान जितेको छ । गणना भइरहेका अधिकांश स्थानीय तहमा एमालेको अग्रता रहेकाले १ नम्बर प्रदेशमा एमालेको बहुमत आउने सम्भावना छ ।
५ नम्बर प्रदेशमा एमालेले ४१ स्थान जितेको छ भने कांग्रेसले ३३ स्थान जितेको छ । गणना भइरहेका ४ ठाउँमा एमालेको अग्रता छ भने कांग्रेसको कुनै पनि स्थानमा अग्रता नरहेकाले ५ नम्बर प्रदेशमा एमालेनै ठूलो दल बन्ने सम्भावना छ ।
७ नम्बर प्रदेशमा कांग्रेसले ३७ र एमालेले ३६ स्थान जितेका छन् । गणना भइरहेका ३ नगरपालिकामा एमालेको अग्रता छ भने एउटामा कांग्रेसको अग्रता रहेको छ । अग्रता लिएका नगरपालिका जितेको खण्डमा एमाले प्रदेश नम्बर ७ मा पनि पहिलो दल बन्न सक्छ ।