मानोरेलको सम्भाब्यता खोज्दै काठमाडौं र ललितपुर महानगर
काठमाडौं – काठमाडौं र ललितपुर महानगरपालिकाले संयुक्त रुपमा मानोरेलको सम्भाब्यता अघि बढाउने भएका छन् । बिहीबार हुने काठमाडौं र ललितपुरको नगरसभामा पेश गरिने बजेटमा मोनोरेलको सम्भाब्यता अध्ययन अघि बढाउने गरी प्रस्ताव पेश हुँदैछ ।
भोलि काठमाडौं र ललितपुर महानगरको नगरसभामा आगामी वर्षको बजेट पेश गर्ने कार्यक्रम छ । दुबै महानगरले आफ्नो प्रस्तावित बजेटमा मोनोरेल सञ्चालनको विषयमा अध्ययन थाल्न कार्यक्रम ल्याउने तयारी गरेका छन् ।
काठमाडौंका मेयर विद्यासुन्दर शाक्य र ललितपुरका मेयर चिरीबाबु महर्जनबीच पनि मोनोरेलको सम्भाब्यता अध्ययनलाई अघि बढाउने बारे छलफल भएको छ । दुबै मेयर पहिलो चरणमा काठमाडौंको बुढानिलकण्ठदेखि ललितपुरको गोदावरीसम्म मोनोरेल चलाउने गरी सम्भाब्यता अध्ययन थाल्न सहमत भएका छन् ।
यसअनुसार नगरसभाका पेश हुने बजेट बक्तब्यमा दुबै महानगरपालिकाले मोनोरेल सञ्चालनका लागि तयारी थाल्ने प्रस्ताव पेश गर्ने भएका छन् ।
अहिले काठमाडौं र ललितपुर महानगरपालिकामा पीपीपी मोडलमा मानोरेल चलाउन विभिन्न कम्पनीहरुले प्रस्ताव पेश गरेका छन् ।
त्यसमध्ये एक मलेसियन कम्पनीको उचित प्रस्ताव आएकाले सो कम्पनीको प्रिजेन्टेशन हेरेर सम्भाब्यता अध्ययनको प्रक्रिया अघि बढाउन तयारी गरिएको ललितपुर महानगरपालिकाका मेयर चिरीबाबु महर्जनले जानकारी दिए ।
यसअघि काठमाडौं महानगरपालिकाले काठमाडौंमा मोनोरेल चलाउनेबारे सम्भाब्यता अध्ययन गर्न एउटा कम्पनीसँग सम्झौता गरिसकेको छ । वाइबिडी सिमेक्स कम्पनी र महानगरपालिकाबीच मोनोरेल चलाउन सम्भाब्यता अध्ययन अघि बढाउनेबारे समझदारी पत्रमा हस्ताक्षर भइसकेको छ ।
मलेसिया लगायतका देशमा ११ मिटर फराकिलो सडकमाथि पनि मोनोरेल चलिरहेकाले काठमाडौंमा यसको सम्भावना राम्रो हुन सक्ने निश्कर्ष दुबै महानगरको छ ।
अब पहिलो चरणमा काठमाडौंको गोदावरीदेखि बुढानिलकण्ठसम्म मोनोरेल चलाएर पछि विस्तार गर्न काठमाडौं र ललितपुरका अन्य नगरपालिकासँग पनि छलफल अघि बढाउने योजना बनेको छ । पछि भक्तपुरका क्षेत्रहरुलाई पनि समेट्ने गरी मोनो विस्तार गर्ने योजना बनेको छ ।
मेट्रो चलाउन काठमाडौंको क्षेत्रफल सानो भएको र जमिन मुनि हुने भएकाले अनेकन सम्सयाहरु आउने अवस्था मोनोरेललाई नै काठमाडौंका सबै स्थानीय तहको अपनत्व हुने गरी अघि बढाउन दुई महानगर एकमत भएका छन् ।
मानो रेलको निर्माण लागत मेट्रोको भन्दा ८० गुणा सस्तो हुन्छ । निर्माण अवधि पनि मेट्रो रेलकोभन्दा एकतिहाइ कम हुने भएकाले यसको राम्रो सम्भावना देखिएको निश्कर्ष उनीहरुको छ ।
मानो रेल गुड्न सकडमा ट्रली बसको जत्रै खम्बा राख्दा हुन्छ । आकाशमा गुड्ने भएकाले यसले सडकको ट्राफिक ब्यवस्थापनमा कुनैपनि किसिमको असर नगर्ने अपेक्षा गरिएको छ ।