अाज शनिबार दिनभर कुन -कुन ठाउँ हुने भयो लाेडसेडिङ
काठमाडौंमा शनिबार दिनभर कुन–कुन ठाउँमा हुने भयो लोडसेडिङ ?
काठमाडौँ, असार ९। नेपाल विद्युत प्राधिकरणले शनिबार ठमेललगायत एक दर्जन स्थानमा विद्युत आपूर्ति बन्द हुने बताएको छ ।
प्राधिकरणले ११ केभी प्रसारण लाइनको मर्मतसम्भार गरी थप व्यवस्थित गर्नलागेकाले शनिबार बिहान ८ बजेदेखि साँझ ५ बजेसम्म विद्युत आपूर्ति बन्द हुने भएको हो । प्राधिकरणका अनुसार ११ केभी प्रसारण लाइनअन्तर्गत लैनचौर फिडरका लाइन मर्मतका लागि विद्युत् आपूर्ति बन्द गर्न लागिएको हो ।
त्यस फिडरबाट विद्युत आपूर्ति भइरहेका लैनचौर दुग्ध विकास संस्थान अगाडिको गणेश मन्दिर, ठमेल जाने चोक, पुरानो नेपाली चुलो, हिटी पोखरी, जय नेपाल हल, हात्तीसार क्षेत्रमा विद्युत आपूर्ति बन्द हुनेछ ।
यसैगरी, नक्साल नारायणचौर, प्रहरी हेडक्वार्टर, भुँडे गणेश, टंगाल स्कुल, नक्साल भगवती मन्दिर, मल्ल होटल अगाडि हुँदै अमृत साइन्स क्याम्पस आसपासका स्थानमा पनि विद्युत् आपूर्ति बन्द हुने रत्नपार्क वितरण केन्द्रले जनाएको छ ।
पर्यटकीय क्षेत्रमा विद्युत् आपूर्ति बन्द हुँदा त्यसबाट पर्ने प्रभावप्रति प्राधिकरणले क्षमा मागेको छ । रासस