छिमेकी भारतको नेपाल नियत : भारतले गरेको विकास निर्माणका काम जताततै कमजोर

विराटनगर ,चैत २५। नेपालमा हुने विकास निर्माणमा आफ्नो संलग्नता देखाउन चाहने छिमेकी मुलुक भारतले जिम्मा लिएका विकास निर्माणको कार्य कुन हद्सम्मको कमसल हुन्छ भन्ने कुरा बारम्बार देखिदै आएको छ ।जिम्मा लिएको दुई दशक वित्दा पनि हुलाकी सडक नबनाएर अल्मल्याएको भारतले धेरै विकास निर्माणका काममा पनि आफ्नो ‘नियत’ देखाउदै आएको छ । यस्को प्रमाण बनेको छ विरानगरमा निर्माणाधीन रेल्वे यार्ड । भारत सरकारले बनाइदिने संरचनाहरु कमसल हुन्छन् भन्ने पछिल्लो उदाहरण बनेको छ, विराटनगरमा निर्माणाधीन रेल्वे यार्ड ।

भारतको सहयोगमा विराटनगर महानगरपालिका वडा नं। १८ बुधनगरमा निर्माण भईरहेको रेल्वे यार्ड गुणस्तरहिन भएकाले भत्कन थालेको छ । यसबाट नेपाललाई हस्तान्तरण गरिने भौतिक संरचना कमसल र कमजोर हुने त होइन भन्ने आशंका बढेको छ ।केही दिन अघि परेको वर्षाका कारण विराटनगर महानगरपालिका वडा नं। १८ बुधनगरमा रेल चल्ने लिकको मध्य भागमा बनाइएको नाला भत्किएको छ भने पर्खालहरुको प्लाष्टर समेत पकपकी उप्किएको छ । हस्तान्तरण गर्ने प्रक्रियामा रहेको सो संरचना मध्ये १ सय ८० मिटर नाला भत्किएको छ ।

 

 

वर्षाका कारण नाला भत्किएको र चाडै नै बनाउने ठेकेदार कम्पनी इरकानले जनाएको छ ।भारत सरकारको करिब २ सय ३८ करोड भारतीय रुपैयाँमा बथनाहा देखि मोरङको कटहरी सम्म रेल्वेको संरचना बनाइएको हो । सो संरचना मध्ये केही संरचना अझै निर्माण भईसकेको छैन । तर बुधनगरसम्म रेल्वे संचालनको प्रक्रिया थालिएको बेला नाला र पर्खालहरु नै भत्कन थालेपछि कमसल निर्माण गरिएको प्रष्ट भएको छ । सम्झौता अनुसार नेपालले जग्गा उपलब्ध गराउने र भारत सरकारले साढे १८ किलोमिटर रेलवे ट्रयाक, स्टेशन विल्डिङ, यात्रु प्रतीक्षालय र संयुक्त चेक प्वाइन्ट निर्माण गर्ने उल्लेख छ ।कमसल वस्तु र भौतिक पूर्वाधार बनिरहेको बारे नेपालको रेलवे विभागले भने हस्तान्तरण अघि कुनै प्रतिक्रिया दिन नमिल्ने बताएको छ ।