प्रदेश एकमा ११ हजार प्रदेश प्रहरी दरबन्दीको प्रस्ताव : संघबाट समायोजन भएकालाइ दुई वरिष्ठ पद थप्न प्रस्ताव
विराटनगर,असार,२३ । प्रदेश प्रहरी विधेयक संसदमा पेस भएकाे छ, प्रदेश १ सरकारले प्रदेशमा ११ हजार प्रहरी दरबन्दी रहने गरी विधेयक पेस गरेको छ । सरकारले पेस गरेको विधेयकमा अतिरिक्त दुईवटा वरिष्ठ पद रहने प्रस्ताव गरिएको छ ।
संघबाट समायोजन भएर आउने प्रहरीका लागि प्रहरी वरिष्ठ हवल्दार र प्रहरी वरिष्ठ नायव निरीक्षक पद थप गर्ने प्रस्ताव गरिएको छ ।
मंगलबार प्रदेश १ को प्रदेशसभा बैठकम प्रदेश १ आन्तरिक मामिला तथा कानुन मन्त्रालयको तर्फबाट मन्त्री हिक्मत कार्कीले संसदमा प्रदेश प्रहरी विधेयक पेस गरेका छन् ।
विधेयक पेस गर्दै कार्कीले संघबाट ११ हजार प्रहरी समायोजन भएर आउने र सोही अनुसारको प्रदेशमा दरबन्दी कायम हुने बताए । समायोजन प्रक्रिया चैत्रबाट सुरु गर्ने भनिए पनि लकडाउनको कारण अगाडि बढ्न नसकेको उनले बताए ।
मन्त्री कार्कीले संघीय कानुन अनुसारसँग नबाझिने गरी प्रदेशको कानुन ल्याएको बताए । संघबाट प्रहरी समायोजन भएर आउनु अघि नै ऐन निर्माण भएको अवस्थामा प्रहरी परिचालन गर्न सजिलो हुने कार्कीले बताए ।नेपाल प्रहरी र प्रदेश प्रहरीले सम्पादन गर्ने कामको सञ्चालन र सुपरिवेक्षण संघीय कानुन बमोजिम हुने व्यवस्था छ ।