वैद्य र डाक्टरपछि झाँक्री लिएर हिँडेका प्रचण्डलाई देखेर ‘माया लाग्छ: प्रधानमन्त्री ओली

काठमाडौं,फागुन ८। नेकपाका अध्यक्ष तथा प्रधानमन्त्री केपी शर्मा ओलीले विगतदेखि नै पुष्पकमल दाहाल ‘प्रचण्ड’लाई उनका सहयात्रीले छोड्दै आएको बताएका छन्।

 

  विराटनगरमा आयोजित आफू पक्षीय सभालाई सम्बोधन गर्दै प्रधानमन्त्री ओलीले सुरुवातदेखिका सहयात्रीले प्रचण्डलाई छोड्न थालेपछि आफुलाई उनी देखेर ‘माया लाग्ने’ गरेको बताए।

 

‘प्रचण्डको जीको मलाई यसो माया लाग्छ, पहिले उहाँसँग वैद्य हुनुहुन्थ्यो। वैद्यले उहाँलाई छोड्नुभयो। त्यसपछि उहाँले डाक्टर लिनुभयो।

 

डाक्टरले पनि उहाँलाई छोड्नुभयो,हाँस्दै ओलीले भने,‘अहिले एउटा झाँक्री लिनुभएको छ। तर, उहाँलाई झाँक्रीले पनि बचाउन सक्दैन।ओलीले मोहन वैद्य, डा.बाबुराम भट्टराई, रामकुमारी झाँक्री र प्रचण्डबीचको सम्बन्धलाई लिएर टिप्पणी गरेका हुन्।

 

ओलीले सम्बोधनको अधिकांश समय सरकारले गरेका काम कारबाही भन्नमा खर्चिएका थिए। उनले नेपाल परापूर्वकालदेखि नै महत्वपूर्ण भूमिका रहेको समेत बताएका थिए।

 

संसदीय व्यवस्था भएको मुलुको प्रधानमन्त्रीले संसद विघटन गर्न पाउने ओलीको अडान छ। काम गर्ने संसदको लागि प्रतिनिधि सभा विघटन गरेको जिकिर गर्दै ओलीले तोकिएको मितिमा मध्यावधि चुनाव हुने बताए।

सम्बोधनका क्रममा उनले सभामुख अग्निप्रसाद सापकोटा र उपराष्ट्रपति नन्द बहादुर पुनको पनि आलोचना गरेका थिए।