नेपाल टेलिकमले ल्यायो ‘फिफा वर्ल्डकप’ प्याकेज ,५६५ रुपैयाँमै हेर्न पाउने
काठमाडौं ।मंसिर ४ गतेदेखि कतारमा आयोजना हुने विश्वकप फुटबल–२०२२ हेर्न नेपाल टेलिकमले आफ्ना एनटीटीभी ग्राहकहरुका लागि फिफा वर्ल्डकप प्याकेज (FIFA World Cup Package) उपलब्ध गराउने भएको छ।
फिफा वर्ल्डकप–२०२२ हेर्नका लागि निर्धारित करसहितको शुल्क रु ५६५ मा एनटीटीभीका ग्राहकहरुले कम्पनीका ग्राहक सेवा केन्द्रमा नगई घरमै बसेर पनि खरिद गर्न सकिने बताएको छ।
यसका लागि वर्ल्डकप प्रसारण हुने हिमालयन एचडी टेलिभिजन च्यानलमा गई ‘बाई प्याकेज’ मा क्लिक गरी आफ्नो मोबाइल नम्बर इन्ट्री गर्नु पर्नेछ।
त्यसपछि नेपाल टेलिकमबाट प्राप्त ओटीपी प्रयोग गरी सेवा खरिद गर्न सकिन्छ। सेवा खरिद गर्दा ग्राहकको मोबाइल व्यालेन्सबाट रकम काटिनेछ।
फिफा वर्ल्डकप–२०२२ हेर्नका लागि तोकिएको फिफा वर्ल्डकप प्याकेज खरिद गर्ने कम्पनीका एनटीटीभी सेवाका ग्राहकहरुलाई उक्त प्याकेज खरिद गर्न प्रयोग गरिएको मोबाइल नम्बरमा कम्पनीका तर्फबाट २८ (अठ्ठाइस) दिनसम्म प्रयोग गर्न सकिने १२ जीबी डाटा समेत निशुल्क उपलब्ध गराइने जानकारी दिएको छ।
टेलिकमकाअनुसार फिफा वर्ल्डकप–२०२२ हेर्नका लागि निर्धारित करसहितको शुल्क रु ५६५ मा एनटीटीभीका ग्राहकहरुले नजिकको कम्पनीको ग्राहक सेवा केन्द्रमा गएर पनि बुझाउन सकिन्छ।
विश्वकप फुटबल अवधिभर उपलब्ध हुने सो अफरबाट ग्राहकहरुले उल्लेख्य लाभ प्राप्त गर्ने अपेक्षा कम्पनीले जनाएको छ।