जसपा नेत्रीको पेस्तोल डान्स-सोधपुछका लागि प्रहरीले बोलायो
काठमाडौं। जनता समाजवादी पार्टी (जसपा)नेपालकी केन्द्रीय नेता डा.बबी सिंह यादवले पेस्तोल पड्काउँदै नाचेको भिडिओ बाहिरिएसँगै प्रहरीले अनुसन्धान अघि बढाएको छ।
जिल्ला प्रहरी कार्यालय सप्तरीका एसपी ढकेन्द्र खतिवडाले पेस्तोल पड्काउँदै नाचेको भिडिओ भाइरल भएपछि यसबारे अनुसन्धान अघि बढाइएको जानकारी दिए। यद्यपी उक्त भिडिओ कहाँको र कहिलेको हो भन्ने विषयमा केही खुलिनसकेको उनले बताए।
भिडिओ सार्वजनिक भएपछि सोधपुछका लागि सिंहलाई बोलाइएको उनको भनाइ छ। हामीले उहाँलाई बोलाइसकेका छौं। उहाँ पनि आउछु भन्नु भएको छ। त्यसपछि यसको वास्तविकता आउला’, एसपी ढकालले भने।
सप्तरीको बोदे बरसाइन नगरपालिका–५ की यादव जसपा नेपालकी उपाध्यक्ष समेत रहेका राष्ट्रिय सभा सदस्य मृगेन्द्र सिंह यादवकी छोरी हुन्।
बुधबार सामाजिक सञ्जालमा बाहिरिएको उक्त भिडिओमा सिंहसँगै अन्य मानिसहरू पनि नाचिरहेको देखिन्छ। पेस्तोलबाट सिंहले एक राउण्ड ‘हवाई फायर’ गरेको र धुवाँ उडेको दृश्य पनि भिडिओमा देखिन्छ । त्यसपछि अर्का युवाले उक्त पेस्तोल समाएको देखिन्छ।