मन्त्रिपरिषद र सत्ता साझेदार दलको बैठक आज बस्दै
काठमाडौं। प्रधानमन्त्री पुष्पकमल दाहालले मन्त्रिपरिषदको बैठक बोलाएका छन्।बिहीबार बिहान ११ बजे सिंहदरबारस्थित प्रधानमन्त्री तथा मन्त्रिपरिषद कार्यालयमा मन्त्रिपरिषद बैठक बस्ने भएको हो।
यो मन्त्रिपरिषदको नियमित बैठक हो। सातामा दुई दिन सोमबार र बिहीबार मन्त्रिपरिषद बैठक बस्ने गर्छ।
यस्तै आज सत्ता साझेदार दलहरूको बैठक पनि बस्दैछ।बिहीबार अपरान्ह ३ बजे बालुवाटारमा सत्ता साझेदार दलहरूको बैठक बस्ने प्रधानमन्त्रीको सचिवालयले जानकारी दिएको छ।
बुधबार साँझ प्रधानमन्त्री दाहाल र नेकपा एमालेका अध्यक्ष केपी शर्मा ओलीबीच बालकोटमा भेटवार्ता भएको थियो।
प्रधानमन्त्री दाहालले मन्त्रिपरिषद विस्तार गर्ने तयारी गरेका छन्, त्यसबारे छलफल गर्न सत्ता साझेदार दलको बैठक बोलाइएको हो।
कुन दलबाट कति जना मन्त्री हुने भन्नेजस्ता विषय टुंगिन बाँकी छ। सरकारले न्यूनतम साझा कार्यक्रम पनि ल्याइसकेको र विश्वासको मतसमेत लिइसकेकोले अब मन्त्रिपरिषद विस्तार गर्न लागिएको हो।