नाउपाले माग्यो मन्त्रालय भागबण्डामा लिखित प्रतिबद्धता, अध्यक्ष रिञ्जता श्रेष्ठको स्टाट्सले सत्ता गठबन्धनमा हलचल
काठमाडौं। सुदूरपश्चिम प्रदेशमा नागरिक उन्मुक्ति पार्टीले मन्त्रालयको भागबण्डामा लिखित प्रतिबद्धता मागेको छ।
मुख्यमन्त्री कमलबहादुर शाहले आइतबार विश्वासको मत लिने तयारी गरेका बेला आठ दलीय सत्तारुढ गठबन्धनमा आबद्ध नाउपाले लिखित प्रतिबद्धता मागेको हो।
दलीय सहमतिको लिखित हस्ताक्षर बिना विश्वासको मत दिन सकिँदैन,नाउपाकी अध्यक्ष रिञ्जता श्रेष्ठले फेसबुकमा स्टाट्स लेखेकी छन्।
नागरिक उन्मुक्ति पार्टी प्रदेश संसदीय दलका नेता रामेश्वर चौधरीले पनि सरकारमा जाने अवस्थामा मन्त्रालयको भागबण्डाका सम्बन्धमा लिखित प्रतिबद्धता दिनुपर्ने माग पार्टीको रहेको बताए।
शनिबार डिल्लीबजारस्थित कारागारमा पार्टीका संस्थापक रेशम चौधरीलाई भेटेर फर्किरहेका चौधरीले लिखित प्रतिबद्धता आएपछि मात्र विश्वासको मत दिन दलको बैठक बसेर निर्णय गर्ने बताए।
२६ माघमा एमालेका राजेन्द्र सिंह रावललाई नागरिक उन्मुक्ति पार्टीले विश्वासको मत नदिएपछि ठूलो दलको हैसियतमा कांग्रेसका शाहलाई सोही दिन प्रदेश प्रमुखले मुख्यमन्त्रीमा नियुक्त गरेका थिए। राष्ट्रतिको निर्वाचनलाई लिएर समीकरण फेरिएपछि नाउपा नयाँ गठबन्धनमा सामेल भएकाे छ।
एमाले गठबन्धनमा प्रदेश सरकार गठनमा नागरिक उन्मुक्ति पार्टी निर्णायक थियो तर अहिलेका मुख्यमन्त्री शाहले भने नाउपा बाहेकका कांग्रेस -१९, माओवादी केन्द्र -११ र नेकपा एकिकृत समाजवादी-४ को साथ पाउदा विश्वासको मत पाउने अवस्था छ।
त्यो बेला रेशम चौधरी लगायतका राजबन्दी रिहाइमा केन्द्रीय सरकारसँग लिखित प्रतिबद्धता मागेको नाउपाले अहिले भने उक्त मुद्दा छाडेको छ। नाउपाले अब मन्त्रालय भागबण्डामा प्रतिबद्धता खोजेको हाे।