महानगरपालिकाले क्रिकेट रङ्गशाला निर्माणमा पहल गर्ने मेयर साहको उद्घोष
काठमाडौं। काठमाडौं महानगरपालिकाका मेयर बालेन साहले सरकारले जग्गा उपलब्ध गराए महानगरपालिकाले क्रिकेट रङ्गशाला निर्माणको पहल गर्ने बताउनु भएको छ।
एशिया कप क्रिकेट अन्तर्गत नेपाल र भारतबीचको खेल हेर्न सोमबार श्रीलंका पुगेका नेपालीहरुको प्रशंग उल्लेख गर्दै सामाजिक सञ्जाल मार्फत मेयर साहले यस्तो बताउनुभएको हो।
काठमाडौं आसपासमा एक सय रोपनी जति जग्गा सरकारले उपलब्ध गराए त्यसमा क्रिकेट मैदान बनाउने पहल महानगरपालिकाले गर्ने उहाँको भनाइ छ।
रङ्गशाला र केहि ठूला प्रतियोगिताहरु हुने हो भने खेलको सहज विकास हुन सक्ने भन्दै उहाँले एउटै प्रतियोगिताबाट करोडौँ रुपैयाँ आर्जन सकिने पनि बताउनु भएको छ।
महानगरपालिकाले खेलाडी र तल्लो तहका खेलाडीको सिकाइका लागि सकेसम्म हरेक वडामा बलिङ नेट राख्ने प्रबन्ध यसअघि नै गरिसकेको पनि उहाँले जानकारी दिनुभएको छ।
नेपाल र भारतबीचको खेल हेर्न विश्वका विभिन्न देशमा रहेका करीब दुई हजार नेपालीहरु सोमबार श्रीलंका पुगेको भन्दै श्रीलंकाको अध्यागमनका कर्मचारी समेत चकित पर्दै एकै पटक नेपालीहरु ओईरिनुको कारण सोधेको साहको भनाइ छ।
श्रीलंका खेल हेर्न पुगेको नेपालीहरुले मात्रै करीब ३० करोड रुपैयाँ बराबरको खर्च गरेको हुनसक्ने पनि मेयर शाहको अनुमान छ।