डोटीमा माटोको ढिस्काले पुरिएर एक महिलाको मृत्यु
काठमाडौं। डोटीमा नयाँ वर्षका लागि घर लिपपोत गर्न माटो खन्ने क्रममा ढिस्कोले पुरिएर एक जना महिलाको मृत्यु भएको छ।
जिल्ला प्रहरी कार्यालय डोटीका सूचना अधिकारी प्रहरी नायब उपरीक्षक निशान्त श्रीवास्तवले आदर्श गाउँपालिका–२ का ६० वर्षीया भागादेवी ओझाको माटो खन्ने क्रममा ढिस्कोले पुरिएर आइतबार मृत्यु भएको बताए।
ओझासँगै ढिस्कोमा पुरिएकी ५० वर्षीया पार्वती खड्काको उद्धार गरिएको उनले बताए। खड्काको जिल्ला अस्पताल डोटीमा उपचार भइरहेको छ।
शनिबार मात्रै माटो खन्ने क्रममा ढिस्कोले पुरिएर शिखर नगरपालिका–९ का २१ वर्षीया निर्मला रोस्याराको मृत्यु भएको थियो। रोस्यारासँगै माटो लिन गएका अन्य तीन महिलालाई उद्धार गरिएको थियो।
स्थानीयबासी नयाँ वर्ष नजिकिएसँगै घर लिपपोतका लागि रातो तथा कमेरो माटो बढी मात्रामा प्रयोग गर्दछन्।