निर्वाचन आयोगले दुई नेकापा भित्र नामको विवाद टुंगो लगायो
काठमाडौं कार्तिक ९ । निर्वाचन आयोगले दुई नेकापा भित्रको नाम विवादको टुंगो लगाएको छ । ऋषि कट्टेलले दिएको निवेदनलाई खारेज गर्दै निर्वाचन आयोगले विवाद टुंगो लगाएको हो ।
आयोगले दुवै नेकपाको नाम फरक देखिएकाले सत्तरुढ दलको नामलाई वैधानिकता दिएको छ । नेकपा भित्र नाम नजुधेको सत्तारुढ दलको नाम नेपाल कम्युनिष्ट पार्टी ने क पा रहेको र ऋषि कट्टेल नेतृत्वको नाम नेपाल कम्युनिष्ट पार्टी मात्रै भएकोले कट्टेलले दिएको निवेदन खारेज गरेको आयोगले जनाएको छ ।
तत्कालिन एमाले र माओवादीको एकतापछि बनेको दलको नाम नेपाल कम्युनिस्ट पार्टी ने क पा राखेपछि ऋषि कट्टेल नेतृत्वको नेपाल कम्युनिस्ट पार्टीले विरोध गरेको थियो । कट्टेलले उक्त दलले आफ्नो दलको नामसँग जुध्ने गरी नाम राखेकाले नाम खारेज गर्न माग गर्दै निर्वाचन आयोगमा निवेदन दिएका थिए ।
प्रमुख निर्वाचन आयुक्त डा अयोधीप्रसाद यादव, आयुक्तहरु इला शर्मा, ईश्वरीप्रसाद पौडेल र नरेन्द्र दालको इजलासले शुक्रबार दुई दलको फरक फरक अस्तित्व देखिएकाले कट्टेलको निवेदन खारेज गर्ने फैसला गरेको हो । फैसलाअघि दुबै नेकपाका प्रतिनिधिसँग आयोगले वुधबार छलफल गरेको थियो ।