निर्मलाका बुवाको स्वास्थ्य अवस्था बिग्रिँदै उपचारका लागि काठमाडौं पठाउने तयारी
कञ्चनपुर –मंसिर ७। बलात्कारपछि हत्या गरिएकी कञ्चनपुरकी १३ वर्षीया बालिका निर्मला पन्तका बावुको स्वास्थ्य अवस्था बिग्रिँदै गएको छ ।
छोरीको न्यायका लागि १३ औं दिनदेखि धर्नामा बसेका निर्मलाका बावु यज्ञराज पन्तको स्वास्थ्य अवस्थासँगै मानसिक अवस्था पनि बिग्रिँदै गएको चिकित्सकहरुले बताएका छन् ।
मृतक निर्मलाका बुवा रातमा नसुत्ने, बडबडाउने र दिँउसो रुँदै अरुलाई गालीगलौज गर्दै बजारमा हिँड्न थालेपछि उहाँलाई सम्हाल्न समस्या भएको स्थानीयवासीले बताएका छन् । पछिल्लो समय उहाँको मानसिक अवस्था अस्वभाविक रुपमा बिग्रिँदै गएपछि परिवार चिन्तित भएका छन् ।
निर्मलाको मृत्युपछि यज्ञराज डिप्रेसनमा गएको भन्दै चिकित्सकले उहाँलाई एकान्त वातारवणमा बस्नुपर्ने सुझाव दिएका थिए । तर छोरीको न्यायका लागि अनिश्चितकालीन धर्नामा बसेकाले पनि उहाँको स्वास्थ्य अवस्था झनै बिग्रिएको नागरिक संघर्ष समितिका संयोजक मीना भण्डारीले बताउनुभयो । निर्मलाका बुवाको स्वास्थ्य अवस्था बिग्रिँदै गएपछि थप उपचारका लागि उहाँलाई काठमाडौं लैजाने तयारी भइरहेको जिल्ला प्रशासन कार्यालयले जनाएको छ ।
निर्मलाका बुवाको अवस्था दिनप्रतिदिन बिग्रिँदै गएकाले स्थानीय प्रशासनबाट परिवार र अधिकारकर्मीको रोहवरमा थप उपाचारका लागि यज्ञराजलाई सुविधा सम्पन्न अस्पतालमा पठाउन पहल भइरहेको निमित्त प्रमुख जिल्ला अधिकारी शंकरबहादुर विष्टले बताउनुभयो । उहाँले निर्मलाको बुवाको बिग्रिँदै गएको स्वास्थ्य अवस्थाका बारेमा केन्द्रमा पनि जानकारी गरेको बताउनुभयो ।
केही दिनदेखि स्वास्थ्यमा समस्या देखिएपछि चिकित्सकको टोलीले धर्नास्थलमै पुगेर पीडित परिवारको स्वास्थ्य परीक्षण गरेको थियो । अहिले उहाँको मानसिक अवस्था झनै बिग्रिँदै गएको छ ।