डेँगु संक्रमण घट्दो क्रममा
चितवन । जाडो समय सुरु भएसँगै जिल्लाका अस्पतालमा आएका बिरामीमा डेँगु र स्क्रब टाइफसको संक्रमण घट्दो क्रममा रहेको छ। गत वर्षको तुलनामा मङ्सिरमा दुवै रोगको संक्रमण घटेको पाइएको छ।
जनस्वास्थ्य कार्यालयका अनुसार गत आर्थिक वर्षमा मङ्सिरमा ११३ जनामा डेंङ्गी देखिएकामा यस वर्ष १२ जनामा यो रोगको संक्रमण भेटिएको छ। कार्यालयका प्रमुख निर्मल घिमिरेका अनुसार यस आवमा पाँच हजार ९२३ जनाको नमुना परीक्षण गरिएकामा अहिलेसम्म १७४ जनामा डेँगुको संक्रमण देखिएको हो।
गत आवकोे मङ्सिरसम्ममा एक हजार ४६३ जनामा यो रोगको संक्रमण देखिएको थियो। गत आवभर १७ हजार ३५३ जनाको परीक्षण गर्दा एक जनाको मृत्यु भएको थियो।
जिल्लामा गत वर्ष साउनमा १६०, भदौमा ३४९, असोजमा ४८७, कात्तिकमा ३३४ र मङ्सिरमा ११३ जनामा डेँगुको संक्रमण देखिएको उनले जानकारी दिए। उनका अनुसार यसवर्ष साउनमा ४२ जना, भदौमा ४४ जना, असोजमा २९ जना, कात्तिकमा ४७ जना र मङ्सिरमा १२ जनामा डेँगुको संक्रमण देखिएको छ।
गत वर्षको तुलनामा यो वर्ष चितवनमा डेँगुको संक्रमण कम पाइएको उहाँले बताउनुभयो। उनले भने,पुस लागेसँगै यो रोगको संक्रमण घट्दै जान्छ।
यो रोग बढीमात्रामा सहरी क्षेत्रमा देखिएको उहाँले जानकारी दिए। एडिस जातको पोथी लामखुट्टेको टोकाइबाट यो रोग सर्छ। डेँगु प्रजाति कुन हो र कसरी यसको विकास भएको छ भन्ने अध्ययन गर्न आवश्यक रहेको उनले बताए।