त्रिदेशीय टी–२० सिरिज: उपाधिका लागि आज नेपाल र पपुवा न्युगिनी खेल्दै
काठमाडौं। हङकङमा जारी त्रिदेशीय टी–२० क्रिकेट शृङ्खलाको उपाधिका लागि आज नेपाल र पपुवा न्युगिनी (पीएनजी) खेल्दैछन्।
फाइनल खेल नेपाली समयअनुसार पौने १२ बजे हङकङको मोङ कोकमा शुरु हुनेछ। हिजो भएका खेलमा नेपालले पीएनजीलाई र पीएनजीले घरेलु टोली हङकङलाई हराउँदै फाइनलमा पुगेको हो।
पीएनजीले हिजो दुई खेल खेलेको थियो। पहिलो खेलमा नेपालसँग हारेको पीएनजीले दोस्रो खेलमा हङकङलाई १० विकेटले हराएको हो।
यसअघि नेपाल र हङकङबीच आइतवार भएको पहिलो खेल वर्षाले स्थगित भएपछि एकरएक अङ्क बाँडिएको थियो।
हिजो नेपालले पीएनजीलाई ८५ रनले हराउँदै फाइनलमा पुगेको हो। त्यसअघि आजै बिहान हङकङ र हङकङको ‘ए’टोलीबीच तेस्रो स्थानका लागि खेल हुनेछ।