नीति निर्माणका लागि कांग्रेस महामन्त्री पौडेलबाट सुझाव माग
काठमाडौं। नेपाली कांग्रेसका महामन्त्री एवं काठमाडौं क्षेत्र नम्बर ५ का प्रतिनिधिसभा सदस्यका उम्मेदवार प्रदीप पौडेलले नीति निर्माणका लागि सुझाव सङ्कलन थालेका छन्।
महामन्त्री पौडेलले सामाजिक सञ्जालमार्फत नीति निर्माणका लागि सार्वजनिक सुझाव मागेका हुन्।आगामी पाँच वर्षका लागि काठमाडौं– ५ को नीति निर्माणमा अमूल्य सुझाव अपेक्षा गरेको छु,उनले भनेका छन् ।
नेता पौडेलले सबै नागरिकले सुझाव दिन सक्ने भन्दै अनलाइन तथा भौतिक दुवै माध्यमबाट सुझाव लिइरहेको बताए ।
यस क्षेत्र र राष्ट्रको नीति निर्माणका लागि दिएको विश्वासकै आधारमा प्रतिनिधि सभामा निर्वाचित भएको थिएँ’ उनले भने, ‘यसपालि आगामी कार्यकालका लागि नागरिकको चाहनाअनुसार अघि बढ्न सुझाव सङ्कलन थालेको हुँ।
महामन्त्री पौडेलले विभिन्न क्षेत्रका विशेषज्ञता प्राप्त क्षेत्रसँग भेटघाट गरेर समेत सुझाव सङ्कलन गरिरहेका छन् । विगतमा आफूले गरेको काम सार्वजनिक गर्दै प्राप्त सुझाव र विज्ञहरूको प्रतिक्रियाका आधारमा आगामी योजना समेत सार्वजनिक गर्ने तयारी भैरहेको उनको सचिवालयले जनाएको छ ।
कांग्रेस महामन्त्री समेत रहेका नेता पौडेलले पार्टीको चुनावी घोषणापत्रका लागि समेत विषय विज्ञहरुबाट सुझाव सङ्कलन गरिरहेका छन् ।