लेबनानमा नेपाली शान्ति सैनिकको हेडक्वार्टरमा आक्रमण
काठमाडौं । राष्ट्रसंघको शान्ति मिसनअन्तर्गत दक्षिण लेबनानमा खटिएका नेपाली शान्ति सैनिकको बटालियन हेडक्वार्टरमा हवाई आक्रमण भएको छ । नेपाली शान्ति सैनिक रहेको मैस अल–जाबालमा शुक्रबार बेलुकी एक्कासी हवाइ आक्रमण भएको हो ।
नेपाली सेनाका प्रवक्ता राजाराम बस्नेतले बटालियन हेडक्वार्टरमा विस्फोट भएको बताए । उनका अनुसार एक घरमा क्षति पुगेको छ, तर कुनै मानवीय क्षति भएको छैन, सबै नेपाली शान्ति सैनिक सुरक्षित छन ।
राष्ट्रसंघले ‘सेक्युरिटी लेभल–३’ लागू गराएपछि ‘यूएन प्रोटोकल’ अनुसार एक साताअघिबाटै नेपाली सेना बंकरमा बस्न थालेको थिए ।
लेबनानमा ५ सय ४० जना नेपाली सैनिक र १३ जना स्टाफ अधिकृत कार्यरत छन् । यद्यपी तीमध्ये आक्रमण भएको ठाउँमा कति सैनिक थिए भन्ने स्पष्ट भएको छैन ।
अहिले लेबनानको शान्ति मिसनमा नेपाली सेनाका उपरथी मानबहादुर महरा ‘डेपुटी फोर्स’ कमान्डर छन् । विस्फोट कताबाट भएको हो भन्ने विषयमा राष्ट्रसंघले अनुसन्धान गरिरहेको सैनिक प्रवक्ता बस्नेतले जानकारी दिए ।
मध्यपूर्वका गतिविधिलाई प्राथमिकता दिने दुबईको ‘द नेसनल’ ले लेबनानको सरकारी समाचार एजेन्सीमा इजरायलले त्यो आक्रमण गरेको आरोप लगाइएको उल्लेख गरेको छ, तर राष्ट्रसंघले अहिलेसम्म कसैलाई दोषी ठहर गरेको छैन ।