गजल/थमाईदिएँ हातमा सलाई……
सीता प्याकुरेल, धादिङ
थमाईदिएँ हातमा सलाई, मजा लिनुहोस् ।
आउनुस् मेरो घर जलाई, मजा लिनुहोस् ।।
छुँदा घोच्छ काँडाले, दुखाउन सक्छ
टाढैबाट हेर्नुस् फूललाई, मजा लिनुहोस् ।
बर्षौंदेखि बल्झिँदै पाक्दैछ यो मनको घाउ
नुन छर्नुस् चलाई चलाई, मजा लिनुहोस् ।
कालोलाई सेतो भन्नुस् हजुरकै छ राज
म अन्धो हुँ मलाई छलाई, मजा लिनुहोस् ।
म गजल बनिदिँए कसैको यादमा
गुन्गुनाउनु होस् मलाई, मजा लिनुहोस् ।