प्रत्यक्ष जननिर्वाचित कार्यकारी राष्ट्रपति प्रणालीको पक्षमा अभियान सञ्चालन गर्छौं: संयोजक गजुरेल
काठमाडौं।कम्युनिस्ट समाजवादी पार्टी, नेपालले वर्तमान संसदीय व्यवस्थाको सट्टा प्रत्यक्ष जननिर्वाचित कार्यकारी राष्ट्रपति प्रणाली स्थापना गर्ने उद्देश्यले व्यापक अभियान सञ्चालन गर्ने घोषणा गरेको छ। पार्टीका संयोजक हरिकृष्ण गजुरेलले आइतबार एक विज्ञप्ति जारी गर्दै यस्तो घोषणा गरेका हुन्।
संयोजक गजुरेलले पार्टीको वैचारिक दिशालाई राष्ट्रिय मुक्ति क्रान्तिको विचारमा आधारित समाजवादी गणतन्त्र र प्रत्यक्ष जननिर्वाचित कार्यकारी राष्ट्रपति प्रणालीको पक्षमा अघि बढाउने जानकारी गराएका छन्। उनले भनेका छन्,राष्ट्रिय मुक्ति एकता अभियान सञ्चालन गर्दै बाह्य हस्तक्षेप र आन्तरिक शोषणविरुद्ध जनतालाई सुसूचित गर्नेछौँ।
गजुरेलले वर्तमान राजनीतिक व्यवस्थालाई दलाल संसदीय व्यवस्थाु भनी संज्ञा दिँदै यसबाट देशलाई मुक्त गराउने आवश्यकता रहेको बताएका छन्। वर्तमान दलाल संसदीय व्यवस्थाबाट देशलाई मुक्त गरी स्वाधीन, समृद्ध र कानुनी राज्य निर्माण गर्न प्रत्यक्ष जननिर्वाचित कार्यकारी राष्ट्रपति प्रणाली अपरिहार्य भएको हामी ठान्दछौँ, उनले भनेका छन्।
पार्टीले जनजीविकासँग प्रत्यक्ष जोडिएका मुद्दाहरूमा पनि संघर्ष सञ्चालन गर्ने जनाएको छ। यसअन्तर्गत गाँस, बास, कपास र रोजगारीको सुनिश्चितता, शिक्षा तथा स्वास्थ्य सेवाको पूर्ण राष्ट्रियकरण तथा सर्वसुलभता सुनिश्चित गर्ने कार्यक्रम रहेको विज्ञप्तिमा उल्लेख छ।
संगठनात्मक विस्तारको सन्दर्भमा पार्टीले समान विचारमा रहेका समूह तथा व्यक्तिहरूलाई पार्टीमा समेट्ने नीति लिएको छ। साथै, वैचारिक एवं राजनीतिक रूपमा नजिक रहेका दलहरूसँग कार्यगत एकता र संयुक्त मोर्चा हुँदै आवश्यक भए पार्टी एकतासमेत गर्ने नीति अपनाएको छ।
पार्टीको आयोजनामा राष्ट्रियता, जनतन्त्र र जनजीविकासँग जोडिएका मुद्दा तथा विदेशी हस्तक्षेपविरुद्ध संघर्ष चलाइने विज्ञप्तिमा उल्लेख छ। यो घोषणाले नेपालको राजनीतिक परिदृश्यमा शासन प्रणालीको बहसलाई नयाँ मोड दिने सम्भावना छ।
कम्युनिस्ट समाजवादी पार्टी, नेपालको यो घोषणाले नेपालको राजनीतिक चर्चामा संसदीय र राष्ट्रपतीय प्रणालीको बहसलाई थप गहिरो बनाउने अपेक्षा गरिएको छ। पार्टीले वर्तमान संसदीय व्यवस्थालाई दलाल व्यवस्थाु भनी आरोप लगाउँदै यसको विकल्पको रूपमा प्रत्यक्ष जननिर्वाचित कार्यकारी राष्ट्रपति प्रणालीको वकालत गरेको छ।