बाजुरामा बाढीले दुई घर बगायो, स्थानीय त्रसित
काठमाडौं । बाजुराको हिमाली गाउँपालिका-१ मा बिच्छ्या खोलामा आएको बाढीले दुई घर बगाएको छ । बुधवार साँझ ७ बजे आएको बाढीले स्थानीय सब्बली थापा र सन्चलाल थापाको घर बगाएको वडा सचिव सन्जिव चौधरीले जानकारी दिए ।
बाढीले झोलुङ्गे पुल र बिच्छ्या माध्यमिक विद्यालयमा समेत क्षति पुगेको छ । वडा कार्यालय पनि बाढीले क्षति पुर्याएको छ।
बाढी गडगडाउँदै आएपछि खोला किनारका बासिन्दा भागेर सुरक्षित अग्लो ठाउँमा पुगेका थिए । लगातार वर्षा भइरहेकाले बाढी अझै बढ्ने र थप क्षति हुन सक्ने भन्दै स्थानीयवासी त्रसित छन् ।
मानवीय क्षति भने भएको छैन । बिच्छ्या खोला कुवाडी खोलामा मिसिने भएकाले कुवाडी खोला आसपासका बासिन्दालाई सतर्क रहन गाउँपालिकाले आग्रह गरेको छ ।