भट्ट भन्छन् देउवालाई ठूलो मतान्तरले हराउँछु

देउवालाई जित्न यस पटक ठूलै कसरत गर्नुपर्ने

प्रतिनिधी सभा निवार्चनमा वाम गठबन्धनको तर्फबाट उम्मेद्वार बनेका माओवादी नेता खगराज भट्टले आसन्न निर्वाचनमा प्रधानमन्त्री तथा नेपाली कांग्रेसका सभापती शेरबहादुर देउवा हराउनमा कुनै जटिलता नभएको बताएका छन् । हाम्रो पक्षमा जित सुनिश्चित हामी सजिलै जित्दैछौँ, फराकिलो अन्तरले जित्दैछु म उनले भने ।

 

नेकपा एमाले र माओवादी केन्द्रको संयुक्त गठबन्धनले देउवाविरुद्ध प्रतिनिधिसभा सदस्यमा माओवादी केन्द्रका पोलिटब्युरो सदस्य खगराज भट्टलाई उतारेको छ । कांग्रेसको दुई खेमामा विभाजित जिल्लाको पार्टी पंक्ति र एमाले–माओवादीबीचको गठबन्धन देउवाका लागि कडा चुनौती बन्ने देखिन्छ । विभाजित पार्टी पंक्तिका कारण स्थानीय तह चुनावमा कांग्रेसले जिल्ला सदरमुकाम रहेको अमरगढी नगरपालिकासहित ३ वटा स्थानीय तहमा पराजय बेहोरेको थियो । स्थानीय तहमा एमाले र माओवादीले ल्याएको मत कांग्रेसको भन्दा ८ हजार बढी छ ।

 

पार्टीको मत बढाएर जित्न देउवालाई यस पटक ठूलै कसरत गर्नुपर्ने यहाँका बुद्धिजीवी बताउँछन् । पछिल्लो संविधानसभा चुनावमा देउवाले आफ्ना प्रतिस्पर्धी माओवादीकै भट्टभन्दा साढे ८ हजार मत बढी ल्याएका थिए । भट्ट ०६४ र ०७० दुवै संविधानसभा निर्वाचनमा देउवाका निकटतम प्रतिस्पर्धी थिए । ०६४ मा भट्ट जम्मा १३ सय मतले पराजित भएका थिए भने ०७० मा साढे ८ हजार मतले । त्यतिबेला एमालेका तारा जोशीले ७ हजार मत ल्याएका थिए । ०७० मा एमाले र माओवादी दुवैको भन्दा देउवाले डेढ हजार बढी मत ल्याएका थिए । भट्ट देउवाविरुद्ध तेस्रो पटक मैदानमा छन् ।