सशस्त्र प्रहरी बलका खेलाडी ड्युटीमा फर्किए
काठमाडौं, चैत,२० । कोरोना संक्रमणको जोखिम र लकडाउनले गर्दा नेपाली खेलकुद अहिले ठप्प छ । त्यसैले नेपाली खेलकुदको एक महत्वपूर्ण अंगको रुपमा रहेको सशस्त्र प्रहरी बल (एपीएफ)का खेलाडीहरु ड्युटीमा खटिन थालेका छन् ।
एपीएफमा जागिरे खेलाडीहरु बुधबारदेखि ड्युटीमा फर्किएका हुन् । चैत १० देखि खेलाडीहरु छुट्टीमा बसेका थिए । चैत १८ गते छुट्टी सकिएपछि खेलाडीहरु ड्युटीमा फर्किएका हुन् । स्रोतका अनुसार गृह मन्त्रालयको आदेशमा अन्तर्राष्ट्रिय खेल खेलिसकेका खेलाडीहरु पनि राष्ट्र सेवाका लागि ड्युटीमा फर्किएका छन् ।
नेपाली महिला राष्ट्रिय टिमकी खेलाडी सावित्रा भण्डारी(साम्बा), नम्बर वान गोलकिपर एन्जिला तुम्बापो सुब्बादेखि अन्य विभिन्न खेलका खेलाडीहरु बुधबारदेखि हलचोकस्थित एपीएफको हेडक्वाटरमा छन् ।
उनीहरुलाई बिहान १० देखि ५ बजेसम्मको ड्युटीमा राखिएको छ । अहिले खेलाडीहरुलाई हेडक्वाटरमा स्ट्यान्डबाई राखिएको र एक दुई दिनपछि फिल्डमै खटाउने सम्भावना रहेको एक खेलाडीले बताए ।
नेपालका लागि सर्वाधिक अन्तर्राष्ट्रिय गोल गरेकी सावित्रा भण्डारी ९साम्बा०ले दुई हप्ता जति ड्युटी खटिनुपर्ने बताइन् ।
कोरोना भाइरस संक्रमण रोकथाम तथा नियन्त्रणका लागि नेपालमा अहिले दोस्रो चरणको लकडाउन छ । नेपालमा एक हजारभन्दा बढीलाई परीक्षण गर्दा ५ जनामा कोरोना पोजेटिभ देखिएको छ । जसमा १ जना निको भएर घर फर्किसकेका छन् । त्यही कोरोना भाइरसका कारण अहिले नेपाल लगायत संसारका धेरै देश लकडाउनमा हुँदा खेल क्षेत्र ठप्प छ ।
पहिलो चरणको लकडाउन चैत ११ देखि १८ गते बिहानसम्म थियो । स्थिति अनुकूल नरहेकाले सरकारले पुनः ८ दिनको लकडाउन अवधी थप गरेको हो । अब चैत २५ गतेसम्म देश लकडाउनमै रहनेछ ।अनलाइन खबरबाट।