फुटबल प्रतियोगितामा कुटाकुट हुँदा ३ जना घाइते भएपछि हेलिकप्टरबाट उद्धार
मुगु। मुगुको सोरु गाउँपालिका भिइमा आयोजना गरिएको फुटबल खेलको सुरुआतमै आपसी कुटाकुट हुँदा चारजना घाइते भएका छन्।
घाइते भएका तीनजनालाई हेलिकप्टरमार्फत प्रदेश अस्पताल कालागाउँ लगिएको प्रमुख जिल्ला अधिकारी खडानन्द खत्रीले बताए। बडादशैँका अवसरमा अलस्टार युवा क्लबद्वारा आज आयोजित उक्त फुटबल प्रतियोगिताको औपचारिक कार्यक्रमको सुरुमै आपसी झडप भएको थियो।
उक्त गाउँपालिका–३ का पवन कार्कीलगायतको टिमले धारिलो हतियार प्रहार गर्दा सोही वडाका प्रकाश धामी,प्रकाश कार्की,जीवन धामी र हिक्मतजंग धामीलाई गम्भीर चोट लागेको थियो।
झडपमा परी गम्भीर घाइते भएकामध्ये तीनजनालाई गाउँपालिकाको सिफारिसमा जिल्ला प्रशासन कार्यालयले हेलिकप्टरमार्फत उपचारका लागि प्रदेश अस्पताल पुर्याएको प्रजिअ खत्रीले बताए।
उक्त घटनाबारे वडाध्यक्ष सिंहबहादुर धामीले घटनास्थलमा आफू नभएकाले खासै जानकारी नभएको बताए तर गत वर्षको पुरस्कार नदिएको भन्दै यसअघि खेलाडीहरू रिसाएकाले कुटाकुट भएको भन्ने आफूले सुनेको उनले बताए।
यता घटनाको मुचुल्का गर्न पुगेका सोरुबर्मा प्रहरीचौकी इन्चार्ज देवबहादुर खड्काको टोली घटनास्थल पुगेको छ। तत्काल घटनाको यथार्थबारे केही भन्न नसकिने अवस्था रहेको इन्चार्ज खड्काले बताए।
प्रजिअ खत्रीका अनुसार उनीहरू उक्त घटना विगतकै विवादका कारण भएको बताए। केही समयअघि पनि उक्त समूहबीच कुटाकुट भएको थियो। आजको घटनामा धारिलो हतियार प्रयोग गर्ने पवन कार्की भनिने व्यक्ति भर्खरै केही महिनाअघि मात्र जेलबाट छुटेको बताए।