चुनावी घोषणापत्रका नाममा जनतालाई झुक्याइएको छ: घनश्याम भुसाल
बुटवल। नेकपा (संयुक्त)का कार्यवाहक अध्यक्ष घनश्याम भुसालले राजनीतिक दलहरूले चुनावी घोषणापत्रमार्फत जनतालाई भ्रममा पार्ने काम गर्दै आएको आरोप लगाएका छन्।
शनिबार बुटवलमा आयोजित पत्रकार सम्मेलनमा बोल्दै उनले राजनीतिक दलहरू सत्तामा पुग्ने उद्देश्यले अव्यावहारिक र असम्भव वाचा गर्दै आएको बताए।
विगतमा रेल, भ्यूटावर र पानीजहाजजस्ता विषय अघि सारेर जनतालाई ढाँटिएको उल्लेख गर्दै उनले यसपटक आगामी पाँच वर्षभित्र १७-१८ प्रतिशत आर्थिक वृद्धि गर्ने प्रतिबद्धता पनि यथार्थभन्दा टाढा रहेको दाबी गरे।
अघिल्ला वाचाबारे गम्भीर प्रश्न नउठाइएकै कारण उस्तै प्रवृत्ति दोहोरिएको उनको भनाइ थियो। नयाँ प्रतिबद्धता गर्नेभन्दा विगत ४० वर्षदेखि अपनाइएको विकासको बाटोबारे पुनर्विचार गर्न आवश्यक रहेको उनले जोड दिए।
भुसालले आसन्न निर्वाचन नेपाली जनताले चाहेर नभई संवैधानिक र लोकतान्त्रिक प्रक्रियाको असाधारण परिस्थितिका कारण अपरिहार्य बनेको तर्क गरे।
राजनीतिक दलहरूको कमजोरी र नालायकीपनमाथि गम्भीर समीक्षा गर्दै राष्ट्रिय संकल्प गर्नुपर्ने बेला निर्वाचनमा केन्द्रित हुँदा मूल समस्या ओझेलमा परेको उनको भनाइ छ।