दशैको पाँचौ दिन आज स्कन्दमाताको पुजा गरिँदै
काठमाडौं,असोज १६ । नेपालीहरुको महान चाड बडादशैको आज पाँचौं दिन देशभरका मठमन्दिर तथा शक्तिपिठहरुमा हिन्दु धर्मावलम्बीको घुइँचो लागेको छ । आज शक्तिस्वरुपा भगवती स्कन्दमाताको विशेष पूजा गरिंदै छ । स्कन्दमाता कमल ओछ्याएर बस्ने भएकाले यी देवीलाई पद्मासना देवी पनि भन्ने गरिन्छ ।
सूर्यमण्डलकी आधिष्ठात्री देवी भएका कारण स्कन्दमाताको पूजा गर्ने भक्तजन अलौकिक तेज र कान्तिले सुसम्पन्न हुने धार्मिक विश्वास छ । आश्विन शुक्ल प्रतिपदादेखि सुरु भएको दशैँ पूर्णिमासम्म दुर्गा भवानीको पूजा गरेर मनाउने चलन छ । काठमाडौँ उपत्यकाका शक्तिपिठमा विहानैबाट भक्तजनको भीड लागेको छ ।
गुह्वेश्वरी, दक्षिणकाली, कालिका स्थान, मैतीदेबी, इन्द्रायणी, तलेजु भवानी, विजेश्वरी, शोभा भगवती, नक्साल भगवती, र भद्रकाली, पाथिभरा, पलान्चोक भगवती, छिन्नमस्ता, मनकामना लगायतका शक्तिपीठहरूमा भक्तजनको बाक्लो उपस्थिति रहेकाे छ ।