कोरोना संक्रमण भयावह हुन नदिऔं: प्रधानमन्त्री ओली
काठमाडौं,चैत ११। प्रधानमन्त्री केपी शर्मा ओलीले कोभिड-१९ को संक्रमण नकारात्मकतातिर गएको भन्दै भयावह हुन नदिन ध्यान दिनुपर्ने बताएका छन्।
बुधबार कोभिड-१९ संकट व्यवस्थापन केन्द्रबाट प्रकाशित ‘नेपालमा कोभिड-१९ महामारी र प्रतिकार्य प्रतिवेदन’ सार्वजनिकीकरण कार्यक्रममा बोल्दै प्रधानमन्त्री ओलीले कोभिड-१९ को संक्रमण नकारात्मकतातिर जाने लक्षण देखिएको भन्दै भयावह हुन नदिन ध्यान दिनुपर्ने बताएका हुन्। यद्यपि, अहिले भयावहको स्थिति नभएको उनको भनाइ छ।
प्रधानमन्त्री ओलीले खोप लगाएर कोभिड-१९ को संक्रमण निर्मूल पार्न सजिलो नभएको पनि बताए। पूर्णरूपमा नियन्त्रण नहुञ्जेलसम्म सामाजिक दूरी कायम राख्नुपर्ने बताए।
तीन दिनदेखि लक्षणहरू फेरि नकारात्मकतातिर जान खोज्या हो कि१ यद्यपि, स्थिति भयावह छैन। तर भयावह हुन नपाओस् भनेर हुनुभन्दा अगाडि नै हामीले ध्यान दिनुपर्दछ,’ उनले भने, ‘अहिले स्थिति भयावह छैन। यसको अर्को जेनेरेसनचाहिँ अझ बढी खतरनाक ढंगले अर्कै प्रकृतिमा पैदा भएको छ।
हिजोको कोभिड-१९ लाई हेरेर तयार गरेको खोपले नयाँ भाइरसलाई काम गर्छ कि गर्दैन भन्ने थाहा नभएको उनले बताए।
एकपटक कडाइका साथ नियन्त्रण गरेर निर्मूल गर्नुपर्ने उनको भनाइ छ। ‘खोप लगाएर निर्मूलन हुन सजिलो छैन। पूर्णरूपमा नियन्त्रण नगरेसम्म खतरा भइरहन्छ।
पूर्णरूपमा नियन्त्रण गर्न सामाजिक दूरी, संक्रमण हुने स्थितिबाट बच्ने, बचाउने। संक्रमण हुने स्थिति नहोस्,’ प्रधानमन्त्री ओलीले भने।
उनले अन्य देशको तुलनामा नेपालमा कोभिड-१९ संक्रमणको असर कम परेको भन्दै फेरि पनि असर कम पर्ने दाबी गरे। संक्रमण बढ्न नदिन स्वास्थ्य मन्त्रालयको निर्देशन मान्नुपर्नेमा उनले जोड दिए।
‘हामीकहाँ यसको असर कम पर्यो। फेरि पनि कम पर्छ र बाहिर अन्यत्रजस्तो यसलाई हामी संक्रमित हुन दिँदैनौँ, दिनु हुँदैन।
विभिन्न तरिका अवलम्बन गर्नुपर्छ,’ ओलीले भने, ‘हामीले नियम, आदेशको पालना गर्नुपर्छ। स्वास्थ्य मन्त्रालय, सिसिएमसीले जारी गरेको नियम मान्नुपर्छ। त्यसो गरेमात्रै हामी यसबाट जोगिन सक्छौँ।
प्रधानमन्त्री ओलीले सरकारको निरोगी नेपाल स्वास्थ्य नीतिका कारण देशमा कोभिड-१९ को प्रभाव कम भएको र नियन्त्रण गर्न सकेको दाबीसमेत गरे।