भुटानी शरणार्थी प्रकरण: सञ्चारमाध्यममा नाम आएकाहरुमाथि पनि अनुसन्धान भइरहेको छ: गृहमन्त्री श्रेष्ठ
काठमाडौ । नक्कली भुटानी शरणार्थी प्रकरणमा सञ्चारमाध्यममा नाम आएकाहरुको बारेमा पनि थप अनुसन्धान भइरहेको उपप्रधान एवं गृहमन्त्री नारायणकाजी श्रेष्ठले बताएका छन् ।
नेकपा एमालेको भ्रातृ संगठन राष्ट्रिय युवा संघ नेपालले नक्कली भुटानी शरणार्थी प्रकरणबारे निष्पक्ष छानबिनको माग गर्दै बुझाएको ज्ञापनपत्र ग्रहण गर्दै उनले यस्तो बताएका हुन्। मन्त्री श्रेष्ठले कोही व्यक्तिले दिएको बयानकै आधारमा मात्रै पक्राउ गर्न नमिल्ने भन्दै थप अनुसन्धान भइरहेको बताए।
राजनीतिक दलहरुले नागरिकलाई जीवन फेरिएको अनुभुति दिन नसकेको भन्दै उनले देशमा व्याप्त भ्रष्टाचारको जालो र कमिसनको जालो नतोड्दासम्म समृद्धिको यात्रा सफल हुन नसक्ने बताए।
‘जनतालाई हामीले जीवन फेरिएको अनुभुति दिलाउन सकेका छैनौँ। त्यसको निम्ति हामीले केही गर्नुपर्छ। हाम्रो देशमा भ्रष्टाचारको जालो धरै व्याप्त छ।
कमिसनले पनि देशलाई जर्जर बनाएको छ,उनले भने,यो कमिसनको जालो र भ्रष्टाचारको जालोलाई नतोड्दासम्म समृद्धिको यात्रा पूरा हुन सक्दैन।
अहिले हाम्रो मिसन, सुशासन, अर्थात भ्रष्टाचारको प्रभावकारी नियन्त्रण गर्नुपर्नेछ। तबमात्रै समृद्धि हासिल हुनेछ। आफ्नै देशको नागरिकलाई अनागरिक बनाइ, अर्काको देशको शरणार्थी बनाइ विदेश पठाइ सम्पती कमाउने काम सह्य हुँदैन।
यस्तो प्रकारको काम भयो भन्नेकुरा अनुसन्धानमा देखिएकाले अनुसन्धानको प्रक्रियालाई अघि बढाएर अदालतमा पेस गरेका छौँ। अन्तिम फैसला अदालतले गर्छ, त्यो फैसला हामीले पर्खनु नै छ। अनुसन्धानको आधारमा हामीले अघि बढाएका छौँ।
प्रहरीलाई आफूले निष्पक्ष रुपमा काम गर्न भनिसकेको पनि उनले बताए । भने, ‘राजनीतिक प्रभाव र अवाञ्छित दबाबबाट मुक्त भएर स्वतन्त्र रुपमा छानबिन गर्न भनेको छु ।
एउटाले बयान दिएकै आधारमा मुद्दा चलाउन मिल्दैन की भनेर अरु प्रमाणहरु पनि खोज्ने प्रयासमा प्रहरी छ। एउटा कसैले भनिदियो भन्दैमा पक्राउ गर्न मिल्दैन। गृहमन्त्री श्रेष्ठले नक्कली शरणार्थी बनाएर देशका नागरिकलाई बेच्ने कार्य कुनै पनि हालतमा सह्य नहुने बताए।