सिके राउत भन्छन्-पार्टीभित्र नेता कार्यकर्ता भड्काउने षड्यन्त्र हुँदैछ
काठमाडौं। जनमत पार्टीका अध्यक्ष सिके राउतले फागुन ११ गते निर्वाचन घोषणा भइसकेको अवस्थामा पार्टीभित्र विभिन्न कार्य गरेर नेता कार्यकर्ताको ध्यान भड्काउने षड्यन्त्र भएको बताएका छन्।
पार्टीका उपाध्यक्ष अब्दुल खानसहित ६ जना नेताहरूले राउतलाई राजीनामा दिन २४ घन्टे अल्टिमेटम दिएपछि राउतले यस्तो समयको अभाव भएको बेलामा पार्टी भित्र विभिन्न कार्य गरेर नेता कार्यकर्ताको ध्यान भट्काउने षड्यन्त्र भएको भन्दै यसमा ध्यान नदिन र यस विषयमा छलफल बहस गरेर समय खेर नफाल्न नेता कार्यकर्तालाई आग्रह गरेका छन्।
सीके राउतको यस्तो छ भनाइ
फाल्गुन २१ निर्वाचनसम्म अन्यत्र ध्यान नभट्काऔं, अन्यत्र शक्ति खेर नफालौं । पहिला निर्वाचनमा जनमत पार्टीलाई नम्बर १ विजयी पार्टी बनाउनेतिर लागौं ।
फाल्गुन २१ गतेको लागि निर्वाचनको घोषणा भइसकेको छ, सबैदलहरूले मानिसकेका छन् र तैयारीमा जुटिसकेका छन्, निर्वाचन आयोग पनि तैयारीमा जुटिसकेको छ । हामीसँग धेरै समय छैन। मुश्किलले साढे ५ महिना समय छ । दुई-तीन महिनापछि पार्टी दर्ता गर्ने र समानुपातिक सूची बुझाउने समय पनि आइसक्छ । यस्तो समयको अभाव भएको बेलामा पार्टी भित्र विभिन्न कार्य गरेर नेता कार्यकर्ताको ध्यान भट्काउने र थकाउने षड्यन्त्र हुँदैछ।
त्यसैले अरूले जे-जस्तो गरे पनि हामीले ध्यान नदिऔं, त्यसको पछि लागेर, त्यो विषयमा छलफल बहस गरेर, पोस्ट गरेर हामी समय खेर नफालौं। हामी सबभन्दा पहिला हाम्रो लागि जुन महाभारत हो, अग्निपरीक्षा हो, त्यस निर्वाचनको तैयारीमा गाउँगाउँ टोलटोलसम्म जुटौं।
नौलो गणतन्त्र नै आगामी निकास हो प्रचार गरौं, बूथ समिति र युवा दस्ता गठन गरौं, प्रशिक्षण दिऔं, परिचालन गरौं। हरेक निर्वाचन क्षेत्रमा चुनाव कसरी जित्ने त्यतातिर लागौं। निर्वाचन पछि सबै कुराको छलफल बहस हुने नै छ। निर्वाचनमा पूरा मधेश कब्जा गरेर र देशकै निर्णायक शक्ति बनेर हामी देखाऔं। त्यो नै हाम्रो विजय हुनेछ।