ओलीले भने-आफूसँगै आफन्त र छिमेकीलाई एमालेमा मत हाल्न लगाउनुस्
झापा। नेकपा एमालेका अध्यक्ष केपी शर्मा ओलीले आफूलाई भेट्न आउनेलाई आफूले मात्र मत दिएर नपुग्ने भएकोले आफ्नालाई पनि एमालेमा मत दिने बनाउन आग्रह गरेका छन्।
आफू र आफ्ना भए देशैभर एमालेको विजयलाई कसैले रोक्न नसक्ने उनले बताएका छन्। सहकारीकर्मीहरूसँग गएराति झापामा भएको भेटघाटमा अध्यक्ष ओलीले आफ्नो मत दिन र आफ्नालाई मत दिलाउन सबै कार्यकर्ता लाग्नुपर्ने बताए।
‘पहिला आफू प्रष्ट हुनुहोस ,देशका लागि सम्झनुहोस । सूर्य चिन्हमा मत दिनुहोस ’ अध्यक्ष ओलीले भने, ‘त्यसपछि आफन्त, छिमेकी सबैलाई सम्झाएर एमालेमा मत हाल्ने बनाउनुहोस।
मैले भेटेका धेरैजनाले हामी सहयोग गर्छौं भन्नुहुन्छ’,ओलीले भने, ‘अहिले तपाईंहरूले दुईवटा सहयोग गर्नुपर्छ। एउटा आफ्नो मत दिने र अर्को आफ्नाहरूको मत दिलाउने।
अध्यक्ष ओलीले आफूले मात्र मत दिएर नपुग्ने भएकोले शानदार विजयका लागि आफ्नाहरुको पनि मत दिलाउनु पर्ने बताएका छन्।
निर्वाचनका बेला सबै पेशा र व्यावशायका मानिसहरू आफ्नो ठाउँबाट पार्टीको तर्फमा जनमत बढाउन प्रयत्न गर्नुपर्ने बताएका छन् ।
उनले झापा ५ मा आफ्नो पालामा भएका विकासका काम नै निर्वाचन जित्ने प्रमुख आधार भएको बताए ।
‘हाम्रो सरकार हुँदा बजेट विनियोजन गरिएका यस क्षेत्रका केही सडकको बजेट हामी सरकारबाट हटेपछि काटियो,’ उनले भने, ‘जसले गर्दा यस वर्ष हुनुपर्ने काम ठप्पै भए । तर यो अवस्था लामो समय रहँदैन ।
अध्यक्ष ओलीले सानो बचत र सानै लगानीले मानिसको आर्थिक अवस्थामा सुधार ल्याउन सकिन्छ भन्ने उद्देश्यले सहकारी अभियान सुरु गरिएकोमा अहिले केही व्यक्तिले त्यसको व्यापक दुरुपयोग गरेको बताए ।
‘जनताले गाँस काटेर बचत गरेको रकममा केही व्यक्तिले ठगी गरेका छन् । सहकारी लुटिएका छन्’, अध्यक्ष ओलीले भने, ‘आफ्नो सहकारीलाई पारदर्शी बनाउनुस् । जनताको आर्थिक स्थिति उकास्न सहयोग पुग्ने गरी लगानी गर्नुहोस । ’
देशको अर्थतन्त्रको महत्वपूर्ण आधार नै सहकारी भएको उनले बताएका छन् । अध्यक्ष ओलीले राष्ट्रिय र स्थानीय विकासका एजेण्डालाई जनतामाझ लैजान पनि आग्रह गरेका छन् ।
‘अहिले राष्ट्रिय र अन्तराष्ट्रिय परिस्थिति पनि ठिक छैन’, उनले भने, ‘एमालेविरुद्ध सबै एक भएर लागेका छन् । हामीले यस्ता सबै घेराबन्दी तोड्न एमाले सक्षम छ भनेर पुष्टि गर्नुपर्छ।