कर्मचारी समायोजनका लागि १ लाख ३५ हजार विवरण सार्वजनिक
काठमाडौं पुस १५ । नेपाल सरकारले संघ, प्रदेश र स्थानीय तहमा कर्मचारी समायोजनका लागि करिब एक लाख ३५ हजार दरबन्दीको विवरण सार्वजनिक गरेको छ। यो विवरण सार्वजनिक भएसँगै समायोजनमा जान चाहने कर्मचारीका लागि कहाँ जाने हो, रोज्न बाटो खुला भएको छ।
सङ्घीय मामिला तथा सामान्य प्रशासन मन्त्रालयका सचिव दिनेशकुमार थपलियाका अनुसार, संघमा करिब ४६ हजार, प्रदेशमा २२ हजार र स्थानीय तहमा ६७ हजार ७५० कुल दरबन्दीको विवरण मन्त्रालयको वेभसाइटमार्फत् सार्वजनिक गरिएको छ।
सङ्घमा मुख्य सचिव एक, सचिव ५५, सहसचिव प्रशासन २५७ कायम भएको छ भने अन्य कानुन, सरकारी वकिल, इन्जिनियरको पनि दरबन्दी यकिन भएको छ। यसैगरी, उपसचिव, शाखा अधिकृतलगायत सबै पद र तहको दरबन्दी सार्वजनिक भएको छ।
सातवटै प्रदेशमा रहने कर्मचारीको दरबन्दीको विवरणसमेत राखिएको छ। यसैगरी, स्थानीय तहमा पशु र कृषि संरचनामा सबैभन्दा बढी सात हजार ७२४ र स्वास्थ्यतर्फ कुल दरबन्दी २५ हजार ७६४ दरबन्दी रहेको छ। सचिव थपलियाले समायोजनमा जान चाहने कर्मचारीले आफूलाई कहाँ जाने हो भनेर रोज्नलाई बाटो खुलेको बताए। यो विवरणअनुसार कर्मचारीको समायोजन भइसकेपछि बाँकी रहेको दरबन्दीमा लोक सेवा आयोगमार्फत खुला विज्ञापन गरिने छ।
समायोजनमा बाँकी रहेका दरबन्दी संघ, प्रदेश र स्थानीय तह जहाँ बाँकी रहन्छ, त्यहीँका लागि खुला विज्ञापन हुने व्यवस्था छ। प्रदेश लोक सेवा आयोगको गठनपछि प्रदेशहरूबाटै खुला विज्ञापन हुने छ। दरबन्दी रिक्त हुने वित्तिकै लोकसेवा आयोगमार्फत सम्बन्धित प्रदेशबाटै पदपूर्तिको प्रक्रिया अगाडि बढ्ने भएकाले भविष्यमा भने कर्मचारीको समस्या नहुने विश्वास मन्त्रालयको छ। गोरखापत्र दैनिकबाट,