भारतले नेपालमा उद्योग खोल्न दिँदैन: महासचिव भूसाल
काठमाडौं। नेपाल कम्युनिष्ट पार्टी (एकीकृत समाजवादी)का महासचिव घनश्याम भूसालले नेपालमा उद्योग स्थापना गर्न नदिन छिमेकी मुलुकले विभिन्न बाधा उत्पन्न गर्ने गरेको आरोप लगाएका छन्।
उनले नेपालमा ऋणको बोझ, नाकाबन्दी र उद्योगहरूको विकासमा अवरोध सिर्जना गर्न भारतको भूमिका रहेको दाबी गरे । भारतले नेपालमा उद्योगहरूको विस्तार रोक्न विभिन्न कानुन बनाउने र कच्चा पदार्थमा उच्च भन्सार लगाउने गरेको उनको भनाइ छ, जसले रोजगारीको अवसरमा समेत समस्या उत्पन्न गरेको छ।
नेपालमा दलित समस्यादेखि ऋणको बोझ, नाकाबन्दी र अपमानको शृङ्खलासम्मका कारण उद्यमको विकास हुन नसकेको हो। भारतले उद्योगहरूको वृद्धि रोक्न कानुनहरू बनाएर र घुसखोरीलाई प्रोत्साहन दिएर प्रपञ्च गरेको छ, उनले भने।
महासचिव भूसालले एकीकृत समाजवादीले यी मुद्दाहरूलाई प्रमुखताका साथ उठाएको बताउँदै नेपालको अर्थतन्त्रलाई ‘दलाल पुँजीवादी’ को संज्ञा दिए। उनले बाहिरबाट सामान आयात गरेर अधिक नाफा कमाउने उद्देश्यले दलाल पुँजीवादीहरूले उद्योग स्थापनाको वातावरण बनाउन नदिएको आरोप लगाए।