नेपाली साहित्यका गोल सिमल प्रेमविनोद नन्दनको निधन

चितवन। प्रसिद्ध कवि एवम् गीतकार प्रेमविनोद नन्दनको निधन भएको छ । आइतबार राति साढे ९ बजेतिर उपचारका क्रममा भरतपुरस्थित चितवन मेडिकल कलेज शिक्षण अस्पतालमा उनको निधन भएको हो। लामो समयदेखि श्वासप्रश्वासलगायत रोगबाट उनी बिरामी थिए।

नन्दन गीत, गजल र कविता लेखनमा सक्रिय थिए । चार गीतिसङ्ग्रह, एक लघु काव्य र एक कविता सङ्ग्रह प्रकाशित छन्। वि.सं. २०११ सालमै ‘झटारो’ गीतिसंग्रह प्रकाशन गरेका उनका गीत नेपाली चलचित्रमा पनि समावेश छन् । दर्जनौँ गीतहरु चलचित्र क्षेत्रमा ख्याती प्राप्त छन्।

उनका गीतिसङ्ग्रहहरु अञ्जली (२०२३), सपनीबाट ब्यूँझेर (२०२३), बिपनीका पाइलाहरु (२०५२), ऐना भित्रको आकाश (२०६३),  सिद्धार्थको गृह त्याग लघुकाव्य (२०७४) र पत्रम पुष्पम(कवितासङ्ग्रह) २०७७ प्रकाशित भएका छन् । यस्तै राष्ट्रिय गान छनोटका क्रममा उनको गीत उत्कृष्ट १० भित्र पर्न सफल भएको थियो।

उनले लामो समय बागिश्वरी, दोभान, मारुनी, गोधुुलीलगायतका साहित्यिक पत्रिकाहरु पनि सम्पदान गरेका थिए । अनौपचारिक शिक्षा आर्जन गरेर गीतसंगीत र साहित्यमा लागेका हुन् ।

नन्दनको अन्त्येष्टि सोमबार नै देवघाटमा गरिनेछ । उनको पार्थिव शरीरलाई बिहान ९ बजेदेखि नारायणी कला मन्दिरमा राखेर श्रद्धाञ्जली दिने कार्यक्रम तय गरिएको छ । उनका श्रीमती, तीन छोरा र तीन छोरी छन्।