देशभरि निजी हतियार सङ्कलन गरिँदै
काठमाडौं । गृह मन्त्रालयको परिपत्रपछि नेपालभरि इजाजतप्राप्त निजी हातहतियारहरू सङ्कलन अभियान तीव्र पारिएको छ। आसन्न प्रतिनिधिसभा निर्वाचनलाई स्वतन्त्र, निष्पक्ष, भयरहित तथा शान्तिपूर्ण बनाउने उद्देश्यले गृह मन्त्रालयले सो कदम चालेको हो।
देशभरिका जिल्ला प्रशासन कार्यालयहरूले सूचना जारी गरी हतियार बुझाउन आह्वान गरेका छन्। कतिपय जिल्लामा तोकिएको म्याद सकिए पनि हतियार बुझाउने क्रम जारी छ भने केहीमा म्याद थप गरिएको छ । उदाहरणका लागि, बैतडीमा कुल १,०८६ इजाजत प्राप्त हतियारमध्ये हालसम्म ४०७ वटा बुझाइसकिएको छ । बाँकीका लागि प्रहरी टोली घर-घरमा पुगेर सङ्कलन गरिरहेको छ।
नवीकरण नभएका हतियारहरू सङ्कलनपछि नवीकरण गरेर मात्र फिर्ता गर्ने योजना छ। पर्सामा पनि म्याद सकिए तापनि बुझाउन आउनेहरूका हतियार स्वीकार गरिएको छ। देशभरि सङ्कलन कार्य जारी छ र सम्पन्न भएपछि मात्र कुल सङ्ख्या थाहा हुने गृह मन्त्रालयले जनाएको छ । करिब दुई वर्षअघि करिब ३० हजारभन्दा बढी इजाजत प्राप्त हतियार रहेको अनुमान थियो ।
नेपालको हातहतियार खरखजाना ऐन, २०१९ र नियमावली २०२८ अनुसार, सिकार वा सुरक्षा प्रयोजनका लागि मात्र सीमित बोरका बन्दुक (जस्तै १२, १६, २०, ४१० बोर टोटावान, भरुवा, हावादारी तथा २२ बोर राइफल) मा इजाजत दिने व्यवस्था छ।
अन्य पिस्तल, रिभल्भर आदि निषेधित छन् । इजाजत लिन जिल्ला प्रशासनमा निवेदन दिनुपर्छ, जसमा सुरक्षा समितिमार्फत पृष्ठभूमि जाँच, स्वास्थ्य परीक्षण हुन्छ । गृह मन्त्रालयको सिफारिसमा वाणिज्य विभागबाट आयात अनुमति पाएपछि मात्र हतियार प्राप्त हुन्छ।
इजाजत प्रत्येक दुई वर्षमा नवीकरण गर्नुपर्छ र एकै जिल्लामा मात्र बोक्न पाइन्छ । अहिलेसम्म इजाजत प्राप्त हतियारबाट प्रत्यक्ष सुरक्षा खतरा देखिएको छैन।