जनताको आवाज उठाउँदा माइक काट्ने सभामुख कुन मुखले भोट माग्दै हुनुहुन्छ: रवि लामिछाने
झापा। राष्ट्रिय स्वतन्त्र पार्टी (रास्वपा)सभापति रवि लामिछानेले जनताको आवाज उठाउँदा माइक काट्ने निवर्तमान सभामुख देवराज घिमिरेले कुन मुखले भोट माग्दै हुनुहुन्छ भनेर प्रश्न गरेका छन्। झापाका मतदातालाई सम्बोधन गर्दै लामिछानेले यस्तो प्रश्न गरेका हुन्।
‘संसदमा जनताको आवाज उठाउँदा माइक काट्ने निवर्तमान समामुख आज कुन मुखले भोट माग्र्दै हुनुहुन्छ,लामिछानेले प्रश्न गर्दै भने, आज उहाँ जनताका घरमा कसरी जानुभएको छ त्यो मलाई थाहा हुने कुरा भएन तर आज म इन्दिरा रानालाई मत माग्दैछु।
सभापति लामिछानेले पुराना राजनीतिक दलको अकर्मण्यताका कारण मुलुकले गति लिन नसकेको बताएका छन्। उनले आफू र आफ्नो पार्टीमाथि राजनीतिक प्रतिशोध साँधिएको भन्दै त्यसले लोकतन्त्रलाई बलियो नबनाउने टिप्पणी गरेका हुन्।
लामिछानेले नयाँ पुस्ताको उदय र परिवर्तनको लहरबाट अत्तालिएर पुराना शक्तिहरूले षड्यन्त्र गरिरहेको आरोप लगाए।हामी काम गर्न आएका हौँ, तर पाइला–पाइलामा अवरोध सिर्जना गरिँदै छ,उनले भने,राजनीतिक प्रतिशोधले व्यक्तिलाई त दुःख देला, तर देश बन्दैन।
सहकारी प्रकरण र पछिल्लो राजनीतिक घटनाक्रमका सन्दर्भमा बोल्दै लामिछानेले आफू छानबिनमा सघाउन सधैँ तयार रहेको तर पूर्वाग्रही ढङ्गले गरिने आक्रमण स्वीकार्य नहुने स्पष्ट पारे। उनले आगामी निर्वाचनसम्म रास्वपालाई अझ बलियो बनाएर लैजाने र जनताको मुद्दामा कुनै पनि सम्झौता नगर्ने दृढता व्यक्त गरे।
उनले आफ्ना समर्थक र कार्यकर्तालाई विचलित नहुन आग्रह गर्दै संयमता र धैर्यताका साथ अघि बढ्न अपिल समेत गरेका छन्।