अहिलेको यक्ष प्रश्न-राजनीतिमा नयाँ अनुहारको उदय,आशा कि आवेग ?

काठमाडौं। नेपालको समकालीन राजनीतिमा यतिबेला ‘नयाँ अनुहार’ बहसको केन्द्रमा पुगेका छन्। सामाजिक सञ्जालदेखि चिया पसलसम्म, विश्वविद्यालयदेखि सार्वजनिक मञ्चसम्म एउटै प्रश्न दोहोरिन्छ अबको राजनीति पुरानै नेतृत्वको निरन्तरता हो कि नयाँ पुस्ताको प्रयोग ?

जेनजी पुस्ताको सक्रियता र आन्दोलनपछि परम्परागत दलहरूप्रति बढ्दो असन्तोषले वैकल्पिक नेतृत्वको खोजी तीव्र बनेको छ। यही परिवेशमा स्थापित नेताहरूलाई चुनौती दिँदै नयाँ पुस्ताका आकांक्षीहरू चुनावी मैदानमा उत्रिएका छन्।

यो चुनावको परिघटना केवल व्यक्तिको प्रतिस्पर्धा होइन,राजनीतिक संस्कार,कार्यशैली र सोचको प्रतिस्पर्धा पनि हो। लामो समयदेखि सत्ताको केन्द्रमा रहेका दलहरूविरुद्ध जनआक्रोश चुलिँदा मतदाताले ‘परिणाममुखी’ र ‘उत्तरदायी’ नेतृत्व खोजिरहेको संकेत देखिन्छ। तर प्रश्न यथावत् छ यो परिवर्तन दीर्घकालीन राजनीतिक पुनर्संरचना हो कि क्षणिक आवेगको परिणाम ?

झापा-५: दुई धारको टक्कर

झापा क्षेत्र नं ५ यतिबेला राष्ट्रिय बहसको केन्द्रमा छ। यहाँ केपी शर्मा ओली र बालेन शाहबीच सम्भावित प्रतिस्पर्धालाई धेरैले अर्थपूर्ण राजनीतिक भिडन्तका रूपमा लिएका छन्।

ओली लामो राजनीतिक अनुभव,बलियो संगठनात्मक संरचना र स्थापित मताधारका कारण प्रभावशाली मानिन्छन्। पार्टी संयन्त्र, कार्यकर्ता परिचालन र रणनीतिक अभ्यासमा उनी पारंगत नेताका रूपमा चिनिन्छन्। झापाको सामाजिक-राजनीतिक संरचनामा उनको गहिरो जरा रहेको छ।

अर्कोतर्फ बालेन शाह युवा पुस्ताको प्रतिनिधि, वैकल्पिक सोच र परिवर्तनको एजेन्डा बोकेर मैदानमा उत्रिएको छवि बनाएका छन्। उनका समर्थकहरू पुरानो राजनीतिक संस्कारबाट निराश मतदाताले नयाँ विकल्प रोज्ने विश्वास व्यक्त गर्छन्। बालेनले सामाजिक सञ्जालमार्फत सशक्त उपस्थिति र स्वतन्त्र छविले युवापुस्तालाई आकर्षित गरेका छन्।

बालने शाह पहिलो पटक चुनावी मैदानमा उत्रिएका छन्, तर सामान्य उम्मेदवारको स्तरमा होइन। उनी सीधा प्रधानमन्त्री पदको आकांक्षा सहित राष्ट्रिय राजनीतिमा प्रवेश गर्दै पहिलो पटक ठूलो चुनौती प्रस्तुत गर्दैछन्। उनी युवा पुस्ताको प्रतिनिधित्व र परिवर्तनको एजेन्डा लिएर मैदानमा आएका छन्, जसले चुनावी माहोलमा नयाँ ऊर्जा र उत्साह थपेको छ।

तर चुनाव केवल लोकप्रियताको खेल होइन। मतदातालाई मतदान केन्द्रसम्म पुर्याउने संगठन, गठबन्धन व्यवस्थापन, स्थानीय समीकरण र मतगणनासम्मको रणनीति उत्तिकै महत्वपूर्ण हुन्छ। यदि परिवर्तनको नारा मतपेटिकासम्म पुग्यो भने मात्र राजनीतिक इतिहास लेखिन्छ, अन्यथा त्यो लहर सामाजिक सञ्जालमै सीमित रहन सक्छ।

काठमाडौं-३: प्रशासकीय छविको परीक्षा

यसैबीच काठमाडौं क्षेत्र नं ३ मा कुलमान घिसिङको उम्मेदवारीले अर्को बहस जन्माएको छ। लोडसेडिङ अन्त्यसँग जोडिएको उनको प्रशासनिक छविले उनलाई परिणाममुखी र कडाइका साथ काम गर्ने नेतृत्वका रूपमा स्थापित गरेको मानिन्छ। उनी उज्यालो नेपाल पार्टीबाट चुनावी प्रतिस्पर्धामा उत्रिएका छन्।

उनका समर्थकहरू कार्यक्षमता, इमान्दारिता र प्रत्यक्ष उपलब्धिलाई मतदाताले प्राथमिकता दिने दाबी गर्छन्। ‘काम देखिएको नेतृत्व’ अबको आवश्यकता हो। तर राजनीतिमा प्रशासकीय सफलताले मात्र पर्याप्त हुँदैन। जनसंगठन विस्तार, दीर्घकालीन रणनीति, गठबन्धन राजनीति र वैचारिक स्पष्टता जस्ता पक्षहरू निर्णायक बन्छन्।

चुनावी मैदानमा प्रवेश गरेपछि कुनै पनि व्यक्तित्व ‘प्रशासक’ बाट ‘राजनीतिज्ञ’ मा रूपान्तरण हुनुपर्छ। त्यसका लागि केवल व्यक्तिगत लोकप्रियता होइन, संस्थागत क्षमता र दिगो नीति आवश्यक हुन्छ।

मेयर छाडेका हर्क 

२०७९ सालको निर्वाचनअघि एउटा अटोमा हाते माइक बोकेर प्रचारमा हिँड्दा हर्क साम्पाङलाई ठूला भनिएका दलले प्रतिस्पर्धी नै मानेनन्। कारण थियो, २०७६ को स्थानीय तह उपनिर्वाचन पाएको जम्मा ४२२ मत र ठूला दलको संगठन।

स्वतन्त्र उम्मेदवारको रुपमा दललाई गाली गरेर २०७९ सालको निर्वाचन जितेका साम्पाङले श्रमदान अभियान चलाए। हराउँदै गएको श्रम संस्कृतिलाई पुनस् प्रयोगमा ल्याएका साम्पाङ फेसबुक स्टाटस र सार्वजनिक अभिव्यक्तिका कारण चर्चामा आइरहे।

खासमा धरान उपमहानगरभित्र उनले न उपमेयरसँग न वडाध्यक्षहरुसँगै विश्वास बढाउन सके। कहिले पत्रकारलाई दुर्व्यवहार गरेर त कहिले निर्णय र काममा एकलौटी पारामा चल्ने हुँदा उनको काफी आलोचना भइरहेको थियो।

दललाई गाली गरेर सुरु भएको उनको राजनीति मेयर निर्वाचित भएको ३ वर्षमै दल निर्माण गर्ने अवस्थामा पुगेका छन्। आफूलाई श्रम संस्कृतिको ब्राण्ड दाबी गर्ने साम्पाङले ‘माटो’ चुनाव चिन्ह लिएर श्रम संस्कृति पार्टी दर्ता गरेका थिए।

जेनजी आन्दोलनपछि स्वतन्त्र र वैकल्पिक शक्ति भनिएका दलहरू एक ठाउँमा उभिनुपर्ने आवाज उठिरहेका बेला उनले आफ्नो नेतृत्वमा श्रम संस्कृति पार्टी दर्ता गरे।

 

परिवर्तनको लहर कि स्थायित्वको निरन्तरता 

यसपटकको निर्वाचनले अनुभवी नेतृत्व र नयाँ अनुहारबीच स्पष्ट ध्रुवीकरण देखाएको छ। एकातिर स्थायित्व, अनुभव र संगठनात्मक मजबुतीको दाबी छ भने अर्कोतर्फ पारदर्शिता, उत्तरदायित्व र नयाँ राजनीतिक संस्कारको माग।

नयाँ अनुहारहरूको उदयले आशा भने अवश्य जगाएको छ। यसले पुरानो ढर्रालाई चुनौती दिएको छ र राजनीतिक प्रतिस्पर्धालाई जीवित बनाएको छ । तर आवेगमा गरिएको निर्णयले दीर्घकालीन स्थिरता दिन सक्छ कि सक्दैन भन्ने प्रश्न खुला छ।

मतदातासामु अहिले भावनात्मक आकर्षण र विवेकपूर्ण निर्णयबीचको छनोट छ। व्यक्तिको लोकप्रियता भन्दा पनि उसले दिने नीतिगत स्पष्टता, संस्थागत क्षमता र राजनीतिक स्थिरताको खाका महत्वपूर्ण हुने छ।

अन्ततः लोकतन्त्रमा परिवर्तन सम्भव मात्र होइन, अपरिहार्य प्रक्रिया हो। तर त्यो परिवर्तन टिकाउ, उत्तरदायी र परिणाममुखी हुनुपर्छ। नयाँ अनुहारहरू आशाको प्रतीक बन्न सक्छन्। यदि उनीहरू आवेगभन्दा जिम्मेवारी, नाराभन्दा नीति र लोकप्रियताभन्दा संस्थागत विकासमा केन्द्रित हुन सके। अन्यथा, यो लहर पनि समयसँगै हराउने जोखिम रहन्छ। अबको निर्णय मतपेटिकामा हुनेछ। परिणामले तय गर्नेछ स्थायित्वको निरन्तरता कि परिवर्तनको प्रयोग।