किसान,मजदुर,गरिब र निमुखाको ऋण कहिले तिर्ने सरकार: डा.भट्टराई
काठमाडौं। पूर्वप्रधानमन्त्रीसमेत रहेका नेपाल समाजवादी पार्टी (नेसपा) का अध्यक्ष डा.बाबुराम भट्टराईले मिटरब्याज पीडितका माग पूरा गर्न सरकारलाई आग्रह गरेका छन्।
काठमाडौँको भृकुटीमण्डपमा बिहीबार डा.भट्टराईले मिटरब्याज पीडितको आन्दोलनलाई ऐक्यबद्धता जनाउदै यस्तो बताएका हुन्।
डा.भट्टराईले गरिब निमुखालाई ऋण दिएर तीनगुना ज्यादा असुल गर्ने र नभए घरजग्गा कब्जा गर्नेक्रम रोकिनुपर्ने बताए। उनले भने, ‘शोषित, उत्पीडित जनताको संघर्ष कहिल्यै पनि टुंगिदैन।
आंशिक रूपमा हामीले थोरै अधिकार त पायौं, पूर्ण अधिकार पाएको छैन। हिजोका क्रान्तिकारी साथीहरू सत्तामा गएर आज करोडपति, अरबपति बन्नुभएको छ।
हिजो चप्पल लगाएर हिँड्ने साथीहरू आज ठूलाठूला महलमा बस्नुहुन्छ। ठूलाठूला ठेकेदारले दिएको आलिसान महलमा बस्छन। उनहरूले किनिदिएका ठूला गाडी चढेर हिँड्हुछन।
अहिले तपाईंहरूलाई बिर्सिए। प्रधानमन्त्री प्रचण्डलाई,सत्ता सम्हालीरहेका कम्युनिस्ट र राजनीतिमा आएका नयाँ साथीहरूलाई आग्रह गरेका छन।
उनले भने,मजदुर,किसानका लागि केही गर्न चाहनुहुन्छ भने यी मजदुर किसानको आन्दोलनले बल पुग्छ। त्यो बल पुर्याउन हामीहरू आएका हौँ।
तपाईंहरूले हिजोका वाचा बिर्सिएर यिनै किसान,मजदुरले तपाईंहरूलाई लगाएको गुणलाई बिर्सिएर ठूलाठालु, कमिसनखोरहरूको पक्षमा लाग्नुहुन्छ भने किसान दाजुभाइ दिदीबहिनीहरूले एउटा विद्रोह गर्नुपर्ने हुनसक्छ। त्यसको निम्ति तपाईंहरू तयार हुनुपर्छ।
सामूहिक ऋण मिनाहा गर्नुपर्ने,गरिब किसानलाई निःशुल्क ऋण प्रदान गर्नुपर्ने,जुनसुकै तहमा हस्तान्तरण भएको सम्पत्ति फिर्ता हुनुपर्ने, अधिकारसम्पन्न न्यायिक आयोग गठन हुनुपर्ने लगायतका ६ बुँदे मागसहित उनीहरू काठमाडौँ केन्द्रित आन्दोलनमा छन्।