लामिछानेका निकट दीपक बोहरा सह-कोषाध्यक्षबाट हटाइए, केन्द्रीय सदस्यमा सिमित

काठमाडौं। राष्ट्रिय स्वतन्त्र पार्टी (रास्वपा)ले पार्टी सह-कोषाध्यक्ष दीपक बोहरालाई पदबाट हटाएको छ। सभापति रवि लामिछनेका निकट मानिएका बोहरा अब केन्द्रीय सदस्यको हैसियतमा मात्र सिमित रहनेछन्।

पार्टीले निर्वाचन आयोगलाई दिएको निवेदनअनुसार पदाधिकारी तथा केन्द्रीय सदस्यहरूको नामावली अद्यावधिक गरेको छ। निर्वाचन आयोगले नयाँ नामावली तयार गरी रास्वपालाई उपलब्ध गराइसकेको छ। उक्त सूचीअनुसार बोहराको स्थिति सह-कोषाध्यक्षबाट केन्द्रीय सदस्यमा परिवर्तन भएको देखिन्छ।

यसअघि बसेको रास्वपाको बैठकमा कार्यवाहक सभापति डीपी अर्यालले बोहरालाई सह-महामन्त्रीमा बढुवाको प्रस्ताव गरेका थिए। तर यो प्रस्तावले पार्टी भित्र विवाद निम्त्यायो। डा.तोसिमा कार्की, सोबिता गौतमसहितका नेताहरूले यसको कडा विरोध गरे। उनीहरूको तर्क थियो कि महिलालाई दिइएको पदमा महिलालाई नै स्थान दिइनुपर्छ। यसैका कारण बढुवाको प्रस्ताव थाँती बस्यो।

पार्टी भित्रको यो घटनाक्रमले एक व्यक्ति, एक पदू को सिद्धान्तलाई समेत प्रतिबिम्बित गर्छ। यसअघि सह-महामन्त्री पदमा सुमना श्रेष्ठ कार्यरत थिइन्। उनले यही सिद्धान्तलाई आधार बनाएर आफ्नो पदबाट राजीनामा दिएकी थिइन्। संयोगको विषय के छ भने उनकै स्थानमा बोहरालाई बढुवाको प्रस्ताव भएको केही दिनमै उनको सह-कोषाध्यक्ष पद समेत गुम्यो।

पार्टी प्रवक्ता मनीष झाले यस विषयमा स्पष्टीकरण दिँदै भने कि यो निर्णय पार्टीको आन्तरिक नीतिअनुसार लिइएको हो।एक जना मात्रै सह-कोषाध्यक्ष राख्ने पार्टीको नीतिअनुरूप उहाँलाई पदबाट हटाइएको हो, अन्यथा केही होइन, झाले भने। वर्तमानमा रास्वपामा बसुमाया तामाङ सह-कोषाध्यक्ष छिन्। यसअघि तामाङसहित बोहरा दुवै जना सह-कोषाध्यक्ष थिए।

यो घटनाले रास्वपा भित्रको आन्तरिक राजनीति र शक्ति संघर्षलाई उजागर गरेको छ। एकातिर पार्टी भित्र लैंगिक प्रतिनिधित्वको मुद्दा छ भने अर्कोतिर पदीय स्थिरताको प्रश्न उठेको छ। बोहराजस्ता सभापतिका निकट मानिने व्यक्तिको पदावनतिले पार्टी भित्रको गुटबन्दी र आन्तरिक संघर्षको संकेत गरेको मानिन्छ।

यस्ता घटनाहरूले पार्टीको एकताप्रति प्रश्न उठाउने बताएका छन्। विशेषगरी रास्वपाजस्तो अपेक्षाकृत नयाँ पार्टीका लागि यस्ता आन्तरिक विवादले दीर्घकालीन प्रभाव पार्न सक्ने उनीहरूको भनाइ छ। तर पार्टीले भने यसलाई सामान्य आन्तरिक पुनर्गठनको रूपमा प्रस्तुत गर्ने प्रयास गरिरहेको छ।