सांसद मेटमणि चौधरीविरुद्ध ५ करोड ४० लाखको चेक अनादर मुद्दा
काठमाडौं। दाङ क्षेत्र नम्बर १ बाट निर्वाचित संघीय सांसद मेटमणि चौधरीविरुद्ध ५ करोड ४० लाख रुपैयाँको चेक अनादर मुद्दा परेको छ।
जिल्ला प्रहरी कार्यालय दाङका प्रहरी नायब उपरीक्षक अर्जुन तिमिल्सिनाले हुलाकमार्फत सांसद चौधरीविरुद्ध चेक अनादरको जाहेरी आएको पुष्टि गरेका छन्। उनका अनुसार जाहेरी उपर अनुसन्धान भइरहेको र मुद्दा दर्ताको प्रक्रिया अगाडि बढाइएको छ।
नेपाल कम्युनिष्ट पार्टी (एकीकृत समाजवादी) का नेता समेत रहेका सांसद चौधरी प्रतिनिधि सभा निर्वाचन २०७९ मा दाङ १ बाट निर्वाचित भएका थिए। उनले यसअघि सहरी विकास मन्त्रीको जिम्मेवारी समेत सम्हालेका छन्।
यो घटनाले संसदीय मर्यादा र जनप्रतिनिधिहरूको आचरणबारे फेरि प्रश्न उठाएको छ। बैंकिङ अपराधअन्तर्गत यस्ता मुद्दाहरूमा कानुनी कारबाही हुने व्यवस्था रहेको छ।
चेक अनादर मुद्दामा परेका सांसद चौधरीले अहिलेसम्म यस विषयमा कुनै सार्वजनिक बयान दिएका छैनन्। मुद्दाको विस्तृत विवरण सार्वजनिक नभएको र अनुसन्धान जारी रहेकाले थप जानकारी आउने अपेक्षा गरिएको छ।