विराटनगरमा आज कांग्रेसको निर्वाचन समीक्षा कार्यक्रम,सभापति थापा सहभागी हुने
काठमाडौं । नेपाली कांग्रेसले आज विराटनगरमा कोसी प्रदेशस्तरीय निर्वाचन समीक्षा कार्यक्रम गर्दैछ । पूर्व निर्धारित कार्यतालिका अनुसार निर्वाचन समीक्षा कार्यक्रम बिहान १०ः ३० बजेदेखि सुरु हुने पार्टीकी सहमहामन्त्री डा.डिला संग्रौलाले जानकारी दिइन्।
पार्टीको प्रदेशस्तरीय संगठन सुदृढीकरण, निर्वाचन परिणामको समीक्षा तथा आगामी रणनीति तय गर्ने उद्देश्यले कांग्रेसले कार्यक्रम आयोजना गरेको हो। निर्वाचन समीक्षा कार्यक्रममा सभापति गगन कुमार थापाले सम्बोधन गर्नेछन्।
त्यस्तै समीक्षा कार्यक्रममा पार्टीका कोसी प्रदेशका केन्द्रीय पदाधिकारी,केन्द्रीय सदस्य, प्रदेश कार्यसमिति, संघीय तथा प्रदेश सांसद,जिल्ला र क्षेत्रीय सभापतिहरू तथा अघिल्लो निर्वाचनमा प्रत्यक्ष र समानुपातिकतर्फका उम्मेदवारहरूको सहभागिता रहने कांग्रेसले जनाएको छ।
२१ फागुनमा सम्पन्न प्रतिनिधिसभा निर्वाचनमा नराम्रो पराजय भोगेको कांग्रेसले पछिल्लो समय विभिन्न प्रदेशमा निर्वाचन समीक्षा कार्यक्रम गर्दै आएको छ।
यसअघि गण्डकी, लुम्बिनी, बागमती र मधेस प्रदेशमा यस्तै समीक्षा बैठक सम्पन्न गरिसकेको कांग्रेस आज कोसी प्रदेशमा कार्यक्रम गर्न लागेको हो।
पार्टी नेतृत्वले समीक्षा कार्यक्रममार्फत स्थानीय तहदेखि प्रदेश तहसम्म संगठनको अवस्था,चुनावी परिणाम,कमजोरी र सुधारका सम्भावनाबारे प्रत्यक्ष सुझाव संकलन गर्दै आएको छ।
साथै आगामी राजनीतिक रणनीति, संगठन विस्तार, क्रियाशिल सदस्यता, १५ औँ महाधिवेशनको तयारी र कार्यकर्ताको सक्रियता बढाउने विषयमा समेत व्यापक छलफल हुने गरेको कांग्रेसले जनाएको छ।
कांग्रेसको कोसी प्रदेशको नेतृत्व व्यवस्थापन तथा संगठन सुदृढीकरणका विषयमा पनि बैठकमा प्राथमिकताका साथ छलफल हुने सहमहामन्त्री संग्रौलाले जानकारी दिइन्।
कांग्रेसले प्रदेशस्तरका समीक्षा कार्यक्रमलाई केवल चुनावी हार–जीतको विश्लेषणमा सीमित नराखी संगठन पुनर्जागरण अभियानका रूपमा अघि बढाइएको जनाएको छ।
विराटनगरको कार्यक्रमलाई कोसी प्रदेश कांग्रेसको आगामी दिशा तय गर्ने महत्त्वपूर्ण अवसरका रूपमा हेरिएको नेताहरुले बताएका छन्।