सरकारी भवनबाट गैरसरकारी सङ्घ-संस्थाका कार्यालय हटाउन निर्देशन
काठमाडौं । जिल्ला प्रशासन कार्यालय काठमाडौंले सरकारी भवन तथा सार्वजनिक निकायका संरचनाभित्र सञ्चालन भइरहेका गैरसरकारी सङ्घ-संस्था र सङ्गठनका कार्यालय हटाउन निर्देशन दिएको छ ।
कार्यालयले सूचना जारी गर्दै संस्था दर्ता ऐन, २०३४ बमोजिम दर्ता भएका तर सरकारी भवनमा कार्यालय सञ्चालन गरिरहेका प्राविधिक तथा पेशागत सङ्घ-संस्थालाई ७ दिनभित्र हटाउन निर्देशन दिएको हो ।
काठमाडौं प्रशासनले सरकारी कार्यालय तथा सार्वजनिक निकायलाई पनि त्यस्ता सङ्घ-संस्थाका बोर्ड तथा संरचना हटाई ओगटिएका स्थान खाली गराउन निर्देशन दिएको छ । सरकारी संरचनामा सङ्घ-संस्थाका कार्यालय सञ्चालन गरेको पाइए कानुनबमोजिम कारबाही गरिने प्रशासनले उल्लेख गरेको छ ।
