प्रचण्डलाई प्रधानमन्त्री ओलीको जवाफ: तपाईंका न कुनै वाचा, न कुनै निर्णय, न कुनै संकल्प,न कुनै काम
काठमाडौं। नेकपा (माओवादी केन्द्र)का अध्यक्ष पुष्पकमल दाहाल (प्रचण्ड)ले आज संसद्मा बोल्दै सरकारका काम कारबाहीका बारेमा आलोचना गरेका थिए। उनले सदनमा सम्बोधन गरेको केही घण्टामै प्रधानमन्त्री केपी शर्मा ओलीले फेसबुकबाट जवाफ फर्काएका छन्।
प्रधानमन्त्री ओलीले भनेका छन्,पूर्वप्रधानमन्त्री पुष्पकमल दाहालजीले आज प्रश्न सोध्नु भएछ–कीर्तिपुरको मैदानमा खोई फ्लडलाइट,खोई प्यारापिट ? मेरो उहाँलाई आग्रह छ, बनिरहेको प्यारापिट हेर्न जानुस्,जडान हुँदै गरेको फ्लडलाइटका पोल हेर्न जानुस्। बनिरहेको छ।
प्रधानमन्त्री ओलीले अझै प्रचण्डले केही काम नगरेको समेत आरोप लगाएका छन्।
उनले लेखेका छन्, तपाईं प्रधानमन्त्री हुँदा कुनै पनि कामलाई टाइमलाइन तोकेर गर्छु भन्नु भएन र तपाईंले केही गर्नु पनि परेन र गर्नु पनि भएन। सरकारको कामबारे तथ्यतथ्यांक राखेर तपाईंले प्रधानमन्त्रीको रुपमा जवाफ पनि दिनु परेन।
तपाईंका त न कुनै वाचा, न कुनै निर्णय, न कुनै संकल्प, न कुनै काम। मैले त दिन तोकेर गर्छु भनेँ, आफैँमाथि प्रश्न आह्वान गरेँ र काम पनि गरेँ। तपाईंले जर्जर छोडेको अर्थतन्त्र अहिले कहाँ पुग्यो, तथ्याङ्क हेर्नुस् भन्ने सुझाव दिन चाहन्छु।