अर्थमन्त्रीको सम्पत्ति: ४ घर-अपार्टमेन्ट,करिब २ करोड बैंक ब्यालेन्स,करोडौंको सेयर लगानी,सुन कति?
काठमाडौं । अर्थमन्त्री डा.स्वर्णिम वाग्लेले आफ्नो सम्पत्ति विवरण सार्वजनिक गर्दै चार वटा घर तथा अपार्टमेन्ट रहेको खुलाएका छन्।
सार्वजनिक विवरणअनुसार ललितपुरको सानेपामा करिब २ करोड रुपैयाँ मूल्यको अपार्टमेन्ट, ललितपुरमै ५ करोड रुपैयाँको घर, काभ्रेमा ३ करोड ७५ लाख रुपैयाँको अपार्टमेन्ट र तनहुँमा करिब २ करोड रुपैयाँको घर रहेको उल्लेख छ।
सम्पत्तिको स्रोतका रूपमा उनले अन्तर्राष्ट्रिय रोजगारी, निजी निवास बिक्री, बैंक ऋण तथा व्यक्तिगत सापटीलाई उल्लेख गरेका छन्। विवरणअनुसार उनको बैंक खातामा १ करोड ९० लाख रुपैयाँ मौज्दात रहेको छ।
त्यस्तै, वाग्लेले आफूसँग ४५ तोला सुन रहेको जनाएका छन्। सेयर लगानीतर्फ सानिमा मिडल तमोर हाइड्रोमा ७१ हजार ९३ कित्ता र सांग्रिला विकास बैंकमा २५ हजार ७६२ कित्ता प्रमोटर सेयर रहेको उल्लेख गरेका छन्।
यसैगरी, नेशनल फन्ड म्यानेज्मेन्ट लिमिटेडमा ९० लाख रुपैयाँ, ठूलो लखोला आयोजनामा ६० लाख रुपैयाँ र अपर मादी हाइड्रोमा ३ करोड रुपैयाँ लगानी रहेको विवरणमा उल्लेख छ। साथै, ९४ लाख रुपैयाँ मूल्यको गाडी पनि रहेको उनले जनाएका छन्।
ऋणतर्फ, ग्लोबल आइएमई बैंकबाट १ करोड ५ लाख रुपैयाँ र व्यक्तिगत सापटीमार्फत २ करोड ५० लाख रुपैयाँ दायित्व रहेको छ। उनले राष्ट्रिय वाणिज्य बैंकबाट ३८ लाख र स्ट्यान्डर्ड चार्टर्ड बैंकबाट ७५ लाख रुपैयाँ ऋण लिएर भुक्तानी गरिसकेको पनि उल्लेख गरेका छन्।